Accessibility links

сишәмбе, 6 декабрь 2016, Казан вакыты 03:47

Millättäşlärebezne yuristlar yaqlıy


Comğa könne Bötendönya tatar kongressı binasında iğtibarğa layıq ber press-konferensiä uzdı. Anda küptän tügel Çiläbe ölkäseneñ Kunaşaq rayonında bulıp qaytqan BTKnıñ Başqarma komitetı qarşında oyışıp kilgän yuridik törkem wäkilläre çığış yasadı. Press-konferensiä başlanır aldınnan jurnalistlarğa ”Tatarstan yaña ğasır” telekompaniäse Çiläbe ölkäsendä töşergän 90-minutlıq maxsus fil'mın kürsättelär. Telejurnalist Firdüs Gıymaletdinov köçle radiatsiä belän ağulanğan Möslim häm Tatar Karabolağı awılları turında teträndergeç süjet töşergän. Press-konferensiädä “anı rusçağa häm inglizçägä tärcemä itep dönya cämäğätçelegenä taratırğa kiräk” digän täqdimnär yañğıradı.

İnde xäbär itkänebezçä, ul törkem belän Çiläbegä tanılğan yazuçı Fäwziä Bäyramova da säfär qılğan ide. Jurnalistlar belän oçraşuda Fäwziä xanım radiatsiä belän pıçranğan tatar awıllarınıñ tragediäse turında açınıp söyläde. Anıñ süzlärenä qarağanda, räsmi käğäzlärdä nurlanışqa eläkkän tatar awılları ul zonadan küçerelgän dip kürsätelä, keşe xoquqların sanğa suqmağan ildä mondıy afätlär qabatlanmas digän garantiä yuq. Bu säfäre xaqında Fäwziä xanım “Azatlıq” radiosına menä närsälär äytte:

AUDİO: (Bäyramova nurlanışqa eläkkän tatar awılların ul cirlärdän küçermäwne belgeçlärneñ täcribä ütkärüenä bäyle dip sanıy. Karabolağı awılı radiatsiägä bötenläy eläkmägän dip sanala. Anda yäşägän 600 keşeneñ 500е yaman şeş awıruınan integä.)

İlle yıl elek bulğan bu qotoçqıç waqiğanı kütärep çığu häläkätkä duçar bulğan millättäşlärne cälläp yılaw, tawış quptaru, gäcit bitlärendä şawlawğa ğına qaytıp qalmayaçaq. Tatar kongressı mondıy igelekle aksiäne başlap cibärep, anı axırına xätle citkerergä niätlänä. Ägär dä Rusiä cirlegendä bu faciğä öçen ğäyeple “Маяк” kombinatı, Atom ministrlığı citäkçelegen cawapqa tartu mömkin bulmasa, köçle nurlanışqa eläkkän biçaralarğa tieşle yärdäm kürsätelmäsä, BTKnıñ Başqarma Komitetı qarşındağı yuristlar, hiçşiksez, xalıqara mäxkämälärgä möräcäğät itärgä cıyınalar.

XS
SM
MD
LG