Ğiraq şiğilarınıñ säyäsi oyışması, ägär dä küçeş çorındağı kiñäşçelär şurasın Ğiraqlılar saylamıyça AQŞ bilgeläp quya ikän, ul şurağa quşılmayaçağın belderde.
Reuters xäbär agentlığı şiğilarnıñ İslam İnqilabı öçen Yuğarı Şurası wäkile Xämid Bayatinıñ bez bilgelänep quyıluçı adminstratsiägä quşılmayaçaqbız digän süzlären kiterä.
Bügen Ğiraqtağı 7 säyäsi törkem wäkilläre häm distäläp kürenekle şäxes Ğiraqtağı AQŞ administratsiäse başlığı Paul Bremer belän oçraşıp şuranı niçek tözü turında söyläşte.
Bu şura Ğiraqtağı koalitsiä xakimiätlärenä säyäsi häm iqtisadıy mäs'älälärdä kiñäş birep toraçaq, ämma ul suveren xakimiätkä iä bulmayaçaq.
Bügen Xalıqara Atom Energetikası Agentlığı wäkilläre Ğiraqtağı atom elektr stansiäsen tikşerügä kereşä.
Alar suğış çorında Bağdad yanındağı ät-Tuwaitha atom elektr stansiäsennän çistartılğan uran rudası urlanğanmı yuqmı ikänen açıqlarğa tieş.
