Accessibility links

җомга, 9 декабрь 2016, Казан вакыты 20:35

İsrael "tınıçlıq yulı" planı nigezendä Fälestin cirlärendäge yähüd awılların yuq itergä äzerlänä


Atna azağında bulğan terror ğamällärendä 5 yähüdneñ häm 5 fälestinleneñ häläk buluın Fälestinnär premyer-ministrı Mähmüd Abbas kisken täñqitläp çıqtı, köç qullanunı tuqtatu öçen tırışlıqlarnı arttırırğa süz birde: "Bez höcümnärne täñqitlibez. Barlıq xalıqqa-köç qullanunı tuqtatunı sorap möräcäğät itäbez, çönki säyäsi yul belän söyläşülär başlarğa telibez. Bu xaqta bez Fälestin qanunçığaru şurasında da iğlan ittek" dip belderde Abbas. Abbas, fälestin suğışçılarına qarşı köç qullanırğa cıyınmawı turında äytte. İslam suğışçılarınıñ Hämäs törkeme, bäreleşlärne tuqtatu turındağı söyläşülärdän baş tarttı. İsrael xärbi köçläre "tınıçlıq yulı" planı nigezendä qanunsız tözelgän yähüd awıllarınnan keşelärne küçerü häm awıllarnı cimerü eşen başlar öçen Könbatış Yardağı Neve Erez awılına cihazlar kiterde. Fälestin cirlärendä yähüdlärne urnaştıru belän şöğellängän YESHA şurası yuq iteläçäk yähüd awıllarınıñ isemlegen tözede. Alarnıñ kübesendä xalıq az yäşi. Fälestin premyer-ministrı Abbas İtaliä xökümäte başlığı silvio Berlusconi belän oçraşmayaçağı turında belderde. Säbäbe-Berlusconi'nıñ Fälestin citäkçese Yasser Arafat belän oçraşudan baş tartuı. Yaqın Könçığışqa säfären başlağan İtaliä premyer-ministrı bügen İsrael xökümäte başlığı Ariel Şaron belän oçraşa. Arafat belän oçraşu-Berlusconi'nıñ köntärtibendä qaralmağan. Mäğlümat ministrı Nabil Amar-İtalyan premyer-ministrınıñ mondıy mönäsäbäte-Yevropa Berlege pozitsiäsenä qarşı kilä, dip belderde. İsrael tışqı eşlär ministrı Silvan Şalom isä bügen Mäskäwgä 3 könlek säfären başladı. Rusiä tışqı säyäsäte başlığı İgor İvanov belän bulğan oçraşu waqıtında Şalom, Rusiä-Yaqın Könçığışta tınıçlıq buldıruda qatnaşqan iñ aktiv yaqlarnıñ berse, häm ike il xökümätläre terrornıñ qurqınıçı turında berdäm fikerdä tora, dip belderde.

XS
SM
MD
LG