Accessibility links

җомга, 9 декабрь 2016, Казан вакыты 14:33

10nçe yün – tabiplar köne.


Sişämbe könne zur yaña eşlär başlarğa yaramıy dilär. Ämma bäyräm itärgä bula. Rusiä meditsina xezmätkärläreneñ hönäri bäyräme Tatarstanğa bigräk tä qağıla. Çönki Qazan – İdel-Ural töbäge tabiplarınıñ märkäze diärgä bula. Biredä zamanında Qazan universitetınnan ayırılıp çıqqan meditsina universitetı bar, distälärçä kafedralar, klinikalar eşli. Siksän yıl elek Qazanda ГИДУВ - tabiplarnıñ belemen kütärü institutı açılğan. Xäzer biredä 15–20läp ölkä häm respublikadan yuğarı belemle tabiplar belemnären yañarta. Bu institutnıñ direktorı bulıp ozaq yıllar eşläwçe Mars Mixaylov respublikadağı keräşen tatarlarınıñ iñ abruylılarınnan berse. Uzğan yılda anı Bötendönya tatar kongressı başqarma komitetı äğzası itep sayladılar. Kurgan şähärendäge ataqlı Yelizarov institutınıñ Qazan filialı kebegräk tözelep, ayaqqa basqan mäşhür travmatologiä institutına söyäk tözätergä, buy üsterergä yäki qısqartırğa ällä qaylardan kilälär. Anıñ belän Başqortostannıñ Fedorovka rayonında tuıp üskän kürenekle xirurg häm menedjer Xäydär Gaffarov citäkçelek itä. Yöräk awırular diagnostikası buyınça iñ zur üzäk Qazanda tözelä. İldäge aldınğı meditsina kolledjınıñ citäkçese Zöhrä Xisametdinova uzğan yılda Rusiädäge barlıq kolledj direktorlarınıñ iñ ğilemle häm buldıqlısı digän isemne yauladı. Respublikanıñ sälämätlek ministrı Kamil Zıyätdinov Tatarstannıñ iñ abruylı citäkçelärennän.

Yaxşı tabiplar, menä digän ğalimnär, şäfqät tutaşları bik küp. Tabiplar bäyräme könne alarnıñ iñ yaxşıları ataqlı “Piramida” zalında cıyıldı. Däwlät Şurası räise Färit Möxämmätşin alarnı hönäri bäyräm belän qotladı. Bu binağa çaqırılu xäzer bik zur däräcä sanala. Tatarstan tabipları aña layıqlı. “Piramida”nıñ timer pıyala tüşämnäre astında qıyınlıqlar onıtılıp torğandır. Alar, älbättä, bar. Aqça qıtlığı, cihaz, urın citmäw elekke sovet meditsinasınıñ bäläse tiz genä ütmi. Ämma säyäsi rejimnar, patşalar kilä dä kitä, ä sawlıqqa moxtaclıq, tän şifası qimmäte ber waqıtta da kimemi. Bu ölkädä eşläwçe millättäşlärebez bixisap, çönki biredä şäfqätlelek, yomşaqlıq taläp itelä, ä aqçanı köräp birmilär. Tatarlar, başqort qärdäşlär sawlıq xezmäteneñ qäderen belä. Tabiplarğa bäxet, barlıq xalıqqa sawlıq teli torğan kön Qazanda zurlap, mäğnäle itep ütkärelde.

Rimzil Wäli, Qazan

XS
SM
MD
LG