Accessibility links

сишәмбе, 6 декабрь 2016, Казан вакыты 22:55

Ni öçen Putin Yakovlevne premier urınbasarı itep quydı?


Russiä prezidentı Putin mädäniyät mäsälälärenä bağışlanğan Dävlät Sovetı utırışına qatnaşu öçen San Petersburgqa kilgäç, anıñ gubernatorı Vladimer Yakovlevne toraq, kommunal xezmät häm yul tözeleşe öçen cavaplı visi- premier itep bilgeläde. Läkin, Yakovlev şuşı postta ozaq vaqıt qalır dip kötelmi. Putinneñ ber dä dus itep qaramağan Yakovlevne şuşı postqa bilgeläveneñ säbäpläre.

Prezident Putin "Dustıñnı yaqın , ä döşmanıñnı taşı da yaqınıraq tot" digän fikerdän çığıp bulsa kiräk, Yakovlevne San Petersburgtan Mäskävgä küçerde kebek. Putin dä, Yakovlev tä San Petersburgnıñ elekke gubernatorı Sobçaknıñ yanında eşlägännär ide. 1996-nçe yılda Yakovlev Sobçaqqa qarşı kandidatlıın quyıp, ciñep çıqtı häm anı çitlätte. Putin üzeneñ ximayäçese Sobçaqqa qarşı eşlängän bu xıyanätne onıtmağan bulırğa tieş. Monı Putinneñ 2000-nçe yılnıñ Fevral ayında prezident bularaq Sobçaqnı kümü yolasında , Sobçaqnı kemneñ gürgä kertkän buluın minän başqa belüçelär dä bar dip äytüe dä kürsätä. Putinneñ Yakovlevne toraq, kommunal xezmät, yullar häm transport öçen cavaplı premier urınbasarı itep bilgeläve, annan qotılırğa teläven genä çağıldıra ala. Çönki, San Petersburg, kommunal toraq, konolizatsiä, yullar mäsäläsendä iñ yaman xäldä bulğan zur şähärlärneñ berse. Şulay uq şähär cinayätçelekneñ başqalası dip tä atala. Anda federal aqçalar da yuğala. Putin üze şähärneñ 300 yıllığına äzerlek öçen alıp barılğan tözekländerü eşläre öçen bilgelängän federal aqçanı , aqçanıñ qayda sarıf itelgän buluınıñ bilgele bulmauı säbäple, tuqtatqan ide. Xisap palatası citäkçese Sergey Stepaşin soñğı atnalarda salım aqçalarınıñ yuğalğan buluı turında dälilläreneñ buluın beldergän häm Yakovlevle vazıyfasınnan kitärgä çaqırğan ide. San Petersburgta toraq, kommunal xucalıq häm yul problemmasın xäl itü mäsäläsendä sälätsez bulıp çıqqan beräv böten Russiä külämendä problemmanı xäl itär dip uylau ber qatlılıq bulır ide. Yakovlevneñ Mäskävgä kitüe belän Putin telägän kandidatnıñ gubernatornıñ postına utıruı ciñeläyä. Putin Valentina Matviyenkonı Tönyaq Könbatış Federal okrugındağı väkile itep bilgeläve belän, aña gubernatorlıq işeklären açtı. Saylaular sintäber ayında ütkärelgän xäldä, Putin köndäşläreneñ Matviyenkonı ciñärlek kandidat tabuları ikele. Ä inde Yakovlevkä kilgändä, anıñ da bu postta ozaq vaqıt qaluı ikele. Çönki Dikäber ayında parlament saylauları ütkäreläçäk. Putin ilneñ xäle tuındağı yıllıq çığışında, parlamentta küpçelekne väkillek itkän xökümät tüziäçägen beldergän ide. Saylaularda Berdäm Russiä partiäseneñ ciñep çığaçağına şik yuq diärlek. İnde üzen şartsız yaqlağan partiäneñ parlamentta küpçelek aluı, prezidentqa Yeltsin çorınnan qalğan şäxeslärdän häm şulay uq Yakovlevtän qotılu mömkinlegen birer ide. Läkin, ikençe yaqtan Yakovlevneñ ikençe gubernatorlıq möddäte bareber bıyıl tula. Dimäk ul gubernatorlıq postına üzeneñ kandidatlığın quya almıy. Ämma, läkin, bu turıdağı qanunğa törleçä añlatma birelä. Qayberävlär, öçençe häm xätta dürtençe märtäbä saylana alalar, qayberävlär tügel. Bälkim Putin Yakovlev, nindi dä bulsa açıq işek tabıp öçençe märtäbä gubernator bula almasın öçen qätği xäl çarası kürüne döreseräk tapqandır. Öçençe ixtimal da bar: Putinneñ xakimiäte kürengäne xätle zur tügel. Şuña kürä ul teläsä dä, sälätsez, läkin, täsire bulğan citäkçelärne çitlätä dä cavapqa da tarta almıy. Şul säbäple ul alarnı vaqıtlıça ğına bulsa da başqarma xakimiätendä yäisä İminlek Şurasında başqa cavaplı urınğa küçerä häm aqırınlap çitlätä. Elekke Gubernator häm Balıqçılıq Ministere Yevgeniy Nazdratenko belän dä şulay eşlägän ide. Läkin, mondıy taktika sälätsez, naçar , rişvätçe citäkçelärgä , alarnıñ cazalandırımayaçaqların häm xätta vaqıtlıça ğına bulsa da, yuğarıraq post belän büläklänäçäklären kürsätkän yalğış işarä bulıp tora. Niçek kenä häm nindi genä säbäplärdän bulmasın, Putinneñ Yakovlevne toraq, yul, kommunal xezmät häm transport öçen cavaplı premier urınbasarı itep bilgeläve, San Petersburg gubernatorınıñ politik karyerasınıñ betüen añlata.

Färit İdelle, Praga.
XS
SM
MD
LG