Accessibility links

чәршәмбе, 7 декабрь 2016, Казан вакыты 13:40

Tabiblarıbız tatarça öyränä...


Sişämbe könne respublikanıñ Sälämätlek saqlaw ministrlığınıñ ber törkem belgeçe üzläreneñ tatar telen niçek belülären kürsätte. Qazanda Tatarstannıñ Ministrlar Kabinetınıñ respublika xalıqlarınıñ tellären üsterü bülege tarafınnan oyıştırılğan tatar telen öyränü kursları eşläp kilä. Respublikanıñ 7 ministrlığında älege kurslar inde ütte, 2003nçe yılda ğına da anda meñnän artıq keşe telne öyrände. Bu eş Tatarstannıñ Respublika xalıqları telläre turındağı qanunın tormışqa aşıru maqsatınnan, tatar teleneñ qullanu dairäsen kiñäytü öçen başqarıla. Ütkän atnada tatar telennän imtixannı Elemtä ministrlığında häm şuşı tarmaqta eşläwçe 30 keşe tapşırdı. Sişämbe könne, 17 yündä isä, şuşı uq sınawdan Sälämätlek ministrlığında eşläwçelär uzdı. Bu uqular niçek ütkän soñ? Sınawlarnıñ näticäläre nindi? Bu xaqta Sälämätlek saqlaw ministrlığınıñ kadrlar bülege citäkçese Ilgiz Xidiätov söyli.

Bu ike aylıq kurslarnı yözdän artıq keşe tämamladı. Alar imtixannı da naçar birmädelär. Min alar öçen bik şat, çönki bezneñ eştä tatar telen belü bik kiräk. Älbättä, şuşındıy qısqa waqıt eçendä ber süz tatarça belmägän keşelärne tatar telendä kamil söyläşergä öyrätep bulmıy. Läkin uquçılarnıñ üzläreneñ teläkläre häm uqıtuçılarnıñ äybät eşläw näticäsendä kursnı tämamlawçılar inde tatar telendä aralaşa ala. Şuña kürä, näticälär äybät dip äytep bula.

Qazanda Tatarstannıñ Ministrlar Kabinetınıñ respublika xalıqlarınıñ tellären üsterü bülege tarafınnan oyıştırılğan tatar telen öyränü kursları şaqtıy uñışlı ğına eşläp kilä. Respublika Ministrlar Kabinetınıñ Tatarstan xalıqları tellären üsterü bülege xezmätkärläre süzlärenä qarağanda, mondıy uqular kiläçäktä dä däwam itäçäk.

Azatlıq radiosı, Gölnaz İlgizär, Qazan

XS
SM
MD
LG