Accessibility links

сишәмбе, 6 декабрь 2016, Казан вакыты 21:03

Mintimer Şäymiev “Kazanskaya Bojya Mater`” ikonasın Rusiägä qaytaru mäs`äläsenä mönäsäbäten belderde...


Bu könnärdä Tatarstanda cämäğätçelek fikere tağın ber tapqır Vatikannan “Kazanskaya Boj'ya Mater'” ikonasın Qazanğa qaytaru problemasına cälep itelde. Sişämbe könne köndälek mäğlümat çaraları Mintimer Şäymievneñ İnterfaksqa birgän äñgämäsen bastırıp çığardılar. Anda Tatarstan prezidentı rim papası İoann Pavel İkençeneñ Rusiägä kilüenä qayber dairälärdän qarşılıq kürsätelüenä qızğanıç belderä. Çönki rim papasınıñ Qazanğa “Kazanskaya Boj'ya Mater' ” ikonasın alıp kilüe kötelä ide. Elegräk tä, Rus provaslav çirkäwe, Vatikan belän Mäskäw patriarxatı arasındağı qarşılıqlar xäl itelmiçä torıp, rim papasınıñ Rusiägä kilüenä qarşı ikänen belderep kilgän ide- dielä älege xäbärdä.

İnde xäbär itkänebezçä küptän tügel Qazan şähäre başlığı Kamil İsxakov mäğlümat oçraşuı waqıtında Mäskäw Patriarxı “Kazanskaya İkona Boj'ya Mater'”nı Qazanğa alıp qaytuğa qarşı bulmawı turında şäxsän aña äytkäne bulğanı turında beldergän ide. Häm menä bu yaña xäbärdä ap-açıq itep, Rus çirkäweneñ tışqı elemtälär bülege citäkçeseneñ:Rus pravoslav häm Rim-katolik çirkäwläre arasındağı dialogta aradaşçılar kiräkmi dip belderüe turında äytelä. Mäğlüm ki Tatarstan, bigräktä Qazan bu dialogta inde yıldan artıq aradaşçılıq mäşäqätläre belän ixtıäri şöğellänä. Kamil İsxaqovnıñ Vatikanğa barıp qaytqanı da bar. Bu aradaşçılıq mäşäqätlärenä tatar cämäğätçelegeneñ dä mönäsäbäte küptän mäğlüm. Tatar ictimaği üzäge: Qazan xakimiäte Vatikandağı ikona yazmışın qayğırtqançı başqalanıñ tarixi urınnarın, häykällären qayğırtsın- digän taläben räsmi möräcäğätlärenä dä kertte inde. Vatikandağı “Kazanskya Boj'ya Mater'” ikonasın qaytaruğa Tatarstan möselmannarı niçek qarıy soñ? Diniä näzaräte räise urınbasarı Wäliulla xäzrät çärşämbe könne Azatlıq radiosına bolay dide. Waliulla xäzrät Tatarstan xalqınıñ yartısı provaslav, yartısı möselman buluın iskärtä. Şuña kürä Diniä näzaräte üz-ara tatulıq, çıdamlıq yağında. Provaslavlarnıñ ruxi, mädäni qimmätlären qaytarularına söyenäbez genä – di.

Küptän tügel Sankt-Peterburgta Rusiä Däwlät Şurasınıñ mädäniätkä bağışlanğan utırışında Çuaşstan prezidentı: mädäniät, mädänilek uramnar, podyezdlar, işek alları tözeklege, çistalığında da ul- digän fiker äytkän ide. Bälki Qazanğa da Vatikandağı mädäni qimmätlär öçen mäşäqätlänep yörgänçe, şähär mädänilegen: uramnar, yortlar tözeklegen çistalığın kübräk qayğırtırğa kiräkter? Sezneñ fikerläregezne dä beläsebez kilä xörmätle tıñlawçılarıbız.

Qazan byurosı. Yunıs Ätnäle.

XS
SM
MD
LG