Accessibility links

пәнҗешәмбе, 8 декабрь 2016, Казан вакыты 23:00

Comğa könne Qazanda tatar internetçıları cıyıldı...


Comğa, 20 yün könne, Qazanda Tatar internetın buldıruçılar häm qullanuçılar cıyıldı. Bu çara inde bik küptännän kötelgän häm anda kem qatnaşırğa, cıyılışta qaysı sorawlar, mäsälälär tikşerelergä tieş digän şaqtıy zur bäxäslär tudırğan ide. Nihayät, tatar internetçıları üzläreneñ kiñäşmäsenä cıyıldı. Älege konferensiäne uzdırunıñ maqsatları, anı ütkärüçelär turında oyıştıruçılarnıñ berse Älfiä xanım Miñnullina bolay di

Älege cıyılışnı uzdıru niäte respublikanıñ İntertat.ru säxifäse tarafınnan belderelde. Respublika xökümäte bu ideyanı xupladı häm oyıştıruda zur yärdäm kürsätte. Bu konferensiä soñğı arada aktiv üseş alğan Tatar internetınıñ maqsatların, töp yünäleşlären buldıru, eşlärne koordinatsiäläw niätennän ütkärelde. Bez Tatar resurslarınıñ üzebez belgän xucaların, qayber iñ aktiv qullanuçıların çaqırırğa tırıştıq. Alar barısı da kilä almadı, läkin monda bügen cıyıluçılar Tatar internetınıñ iñ aktiv öleşe

Konferensiäneñ berençe öleşendä cıyılğan İnternetçılar kübräk söyläşügä kilgän qunaqlarnı tıñladılar. Qunaqlar arasında Tatar internetın üsterergä Tatarstan xökümäteneñ yärdämen wäğdä itkän respublikanıñ Ministrlar Kabinetı wäkile, tatar kongressınıñ eşçänlege häm anıñ saytı belän tanıştırğan kongressnıñ Başqarma komitetı räise urınbasarı da bar ide. Tatarstannıñ Däwlät Sovetı wäkile Räzil Wäliev kompyuter çeltäre tatarlarnıñ ızğış urını bulmasın, anda tatar telenä kübräk urın birelsen ide, digän teläklär belderde. Läkin konferensiäneñ iñ qızıqlı häm iñ möhim öleşe bulıp Tatar internetın buldıruçılarnıñ söyläşüe tordı älbättä. Anda Tatarstannan, Mäskäwdän, Ufadan, Çiläbedän häm başqa cirlärdän kilgän internetçılar berdäm terminologiä, kirilda häm latindağı şriftlar, kodirovkalar turında söyläşte, aralaştı, bäxäsläşte. Şulay uq anda tatar internetçılarınıñ ictimaği oyışmasın buldıru, Tatarstannıñ räsmi säxifälärendä tatar telenä ähämiätne arttıru xaqında da süz bardı. Ğömümän, älege cıyılışta İnternetnıñ tatar öleşe öçen aktual bulğan şaqtıy ğına mäsälälär qaraldı. Konferensiädä qatnaşuçılar menä şundıyraq fikerlär äyttelär

Bu konferensiä bik kiräk häm anı inde küptännän oyıştırırğa ide. Ul bik näticäle ütte. Andıy oçraşular yışraq uzsa, tağın da äybäträk bulaçaq.Cıyılış bik qızıqlı häm näticäle uzdı. Bez monda üzebezne qızıqsındırğan tatar şriftları häm süzleklär mäsäläsen tikşerdek.Konferensiäneñ töp maqsatı – bergä cıyılışıp, tanışıp, söyläşep utıru ide. Bez bu maqsatqa ireştek. Läkin bez qullanuçılar ğına bar problemalarnı xäl itä almıybız. Bezgä xökümät yärdäme kiräk.

İnde işetkänegezçä, qatnaşuçılarnıñ barısı da diärlek älege konferensiäne bik möhim çara dip bäyälädelär. Qayberäwlär, monda çınlap torıp eşläwçelär küp tügel bit, qullanuçılar ğına cıyılğan, alar närsä xäl itä alırlar ikän digän şiklär beldersälär dä, barıber cıyılışnı ütkärergä kiräk ide, yl şaqtıy uñışlı uzdı, dip äyttelär. Şulay itep, Tatar internetçıları xäzer İnternetta ğına tügel, ä çın tormışta da oçraşıp söyläşte. Älege oçraşunıñ näticälären inde waqıt häm İnternet kürsäter.

Gölnaz İlgizär, Azatlıq radiosı, Qazan

XS
SM
MD
LG