Accessibility links

дүшәмбе, 5 декабрь 2016, Казан вакыты 19:40

Tatarstan başqalasında Saban tuyları ütte...




21 yün, şimbä Qazan öçen bäyräm kön. Tatarstan başqalasınıñ 7 rayonında dä bäyräm çaraları ütä. Qazannıñ Waxitov rayonı Saban tuyın Üzäk yal parkında ütkärde, Mäskäw rayonı xakimiätläre batırlarnı «Tasma» stadionında köräşterde, İdel buyı rayonı xalqı Därwişlär bistäsendäge Qayınlıqqa bardı, Aviatözeleş rayonı xakimiätläre millättäşlärebezne «Rubin» stadionına häm parkqa çaqırdı, Yaña-Savin rayonı Qazansu yılğası yarında Saban tuyın ütkärde, Kirov rayonı xalqı Aqqoş küle yarında bäyräm itte. Şähär eçendäge mäydannarğa ğadi tramvay-troleybus yörsä, şähärdän çitkä avtobuslar taşıp tordı. Qazan xalqı bu ayda berençe cäyge köngä söyenep, yaqtı töstäge kiemnärdän ide. Ara tirä tübätäy kigän abzıylarnı da oçratıp buldı.

Qayınlıqtağı saban tuyında Prezident Mintimer Şäymiev ta buldı, Sverdlaw ölkäse gubernatorı Eduard Rossel dä qatnaştı. Başqalanıñ här rayonında diärlek, kilgän qunaqlarnı qarşı aldılar. Kirov rayonı bäyrämendä mäsälän Sember ölkäse häm Çuaşstan respublikası qunaqları bar ide. Aqqoş külendäge Saban tuyında xalıqnıñ milli bäyrämebez belän parlament räise Färit Möxämmätşin qotladı.

Äle kiçä genä başqalada bulıp uzğan tatar internetçıları seminarında qatnaşuçılar da, şul uq Saban tuyında buldı.



Älege bäyrämdä, törle din häm millät ähellären kürep buldı. Ber yaqta Krişnağa ışanuçılar küñel açıp, cırlap utırsa, ikençe ber cirdä, ikona, pravoslav dinenä qarağan äyberlärne satalar ide. Hawada qızdırılğan it ise taralğan, çäy eçüçelär dä, sumsa aşawçılar da bar. Bağanağa menü häm awış ağaçtan yörü bäygelärendä kübräk balalar qatnaştı. Alar yanında, äti-änilär dä, äbi-babalar da bulıp, alarğa köç birep tordı. Ölkän buyın tatarları öçen saban tuyı yäşlek istälekläre belän bäyle, bälkem şuña da ğädättä moñsu küzle äbilär häm babaylar , bäyrämdä şat ide.

Ğadi xalıq arasında, tar ğına yullarda etelep yörgäç, kirtä belän äyländerep alğan mäydan yanında kildek. Andağı qapqa saqçıları belän, fiker alışıp alğannan soñ, şuşı mäydanğa ütep kerä aldıq. Aqqoş külendä atqan fontannar, mäydanğa üzenä kürä ber yäm birep tordı. Mäydän buylap tezelep kitkän urındıqlarda, Saban tuyına kilgän qunaqlarnı, sportçılarnı, oyıştıruçılarnı kürep bula ide. Ber yaqta köräş kelämnäre cäyelgän, ikençe ber cirdä artistlar cırlap tora. Ber qırıyda, «TAİF» dip yazılğan külmäklärdän ber törkem, arqan tartu bäygesenä äzerlänä ide. Saban tuyında xämer, araqı satmaw turında süz waqıt-waqıt kütärelsä dä, bu ulı aña qolaq saluçı bulmadı. Kiştälärdä sırası da, araqısı da tezelep tordı. Läkin iserep, aunap yatuçılar küzgä çalınmadı. Şuşında uq milli azıqlar, öçpoçmaq, pärämäçlär dä satıldı, xätta qıstıbıy belän göbädiädän dä awız itep buldı bu bäyrämdä.

Bikä Timerova, Qazan.

XS
SM
MD
LG