Accessibility links

Кайнар хәбәр

Rusiä xakimiate ildäge soñğı bäysez federal'' telekanalnı yaptı


Rusiädä bäysez televideniä çorı azağına yaqınlaştı diärgä bula, ilneñ matbuğat ministrlığı yäkşämbe kiçen TVS telekanalı tapşıruların tuqtatu kürsätmäsen çığardı. TVS bügenge köngä qädär Rusiädäge soñğı bäysez telekanal ide, xäzer anıñ tapşıruları urınına tamaşaçılar sport yarışların qarayaçaq.

Üzeneñ şuşı qararın Rusiä matbuğat ministrlığı, TVS telekanalındağı "finans, kadrlar häm idarä krizisı", yäğni andağı buldıqsızlıq belän añlatsa da, ildäge soñğı bäysez televideniäne yabu artında küplär säyäsi maqsatlarnı kürä. Dikäbrdä uzaçaq Duma saylawları häm kiläse martqa bilgelängän prezident saylawları aldınnan Rusiädäge federal'' telekanallarda däwlät televideniäse monopoliäse urnaştırıldı - soñğı qararnıñ töp näticäse şul. Berençe kanal, yäisä NTV formal'' yaqtan aksioner şirkät sanalsa da, andağı töp öleş barıber däwlät belän bäyle oyışmalar qulında, häm andağı möxärriat säyäsäten inde küptännän Kreml''gä yaqın dairälär alıp bara. TVS-ta isä älegä qädär, 2001-nçe yılda NTV-dan quwılğan sälätle häm bäysez fikergä iä keşelär eşli ide, alarnıñ citäkçese Yevgeni Kiselev Mäskäwdäge Moscow Times basmasına, "mindä şundıy xis bar ki, böten bu närsälär kemneñder teläwe belän eşlänä, waqiğälärgä kemneñder yawız niäte citäkçelek itä sıman" dip belderde. Kiselevnıñ komandası däwlät NTV-nı üz qulına alğannan soñ başta TV6-ğa kitkän ide, läkin soñraq ul da yabıldı, annarı soñ alar TVS-qa kilde. Xäzer inde bu şirkät xaqında da ütkän zamanda ğına söyläp bula. Ber qarasañ, TVS-nıñ yabıluwı alay uq kötelmägän xäl bulmadı - anda çınnan da finans problemalar citärlek külämdä cıyıldı. Häm däwlät moñardan bik osta faydalanıp qalırğa buldı. Cämäğätçelekkä, bazar taläpläre menä şundıy, problemaları öçen bäysez kanal üze ğäyeple digän fiker taratılıp kilde. TVS eşen tuqtatu turındağı belderüwendä Rusiäneñ matbuğat ministrlığı, anıñ finans awırlıqlarına işarä itep, bu şartlarda tamaşaçılar mänfäğäten qayğırtu maqsatında tieşle qarar qabul itü kiräk ide dip belderä. Rusiä qanunnarı nigezendä, mäğlümat çarasın yabu turındağı qararnı isä barı tik mäxkämä genä çığara ala. Matbuğat ministrlığı şulay itep, bäysez TVS-nı yabuwı belän süz wä matbuğat ireklegen genä tügel, ilneñ qanunnarın da boza bulıp çığa. Häm küplär monı, Mäskäwdäge üzäk xakimiat inde berniçä yıl däwamında alıp barğan irekle medianı buu säyäsäteneñ ber çağılışı dip bäyäli. "Azatlıq"nıñ Ufadağı xäbärçese TVS-nı yabu xaqında fikerlären belü öçen başqort wä tatar zialılarına, jurnalist häm dramaturg Söläyman Latıpovqa häm Başqort däwlät universitetı möğälimäse, tatar filologiäse kafedrasında eşläwçe Liliä Säğidullinağa möräcäğät itkän ide.

Audio, Söläyman Latıpov

... dip isäpli dramaturg Söläyman Latıpov. Liliä xanım Säğidullina da, TVS kanalın yabu artında Mäskäwneñ Duma häm prezident saylawlarına äzerlege häm mäğlümat qırın bäysez uyınçılardan azat itü teläge yata dip uylıy.

Audio, Liliä Säğidullina

TVS-nı yabu, Rusiä cämäğätçelegen ildä barğan xällärgä başqaçaraq qaraş belderü belän tanışu mömkinlegennän mäxrüm itte. Berençe kanal, NTV, räsmi "Rossiä" qanalın inde äytep tä torası yuq, xäzer barısı da berük qaraşnı, Mäskäw Kremle qaraşın ğına yaqtırta. Alarda prezident säyäsätenä şik belderü bötenläy yuq, bu Rusiädä xäzer tıyılğan ber temağa äylände.

Kärim Kamal, Praga.
XS
SM
MD
LG