Accessibility links

җомга, 9 декабрь 2016, Казан вакыты 03:17

Sverdlau tatarları tormışınnan...


Sverdlov ölkäseneñ Krasnoufim rayonı, Raxman awılında bu yılğı sabantuy olı bäyräm – awıl mäktäbeneñ 85 yıllıq yubileyı belän bergä turı kilde. İrtä tañnan uq mäktäp binasında bik küp keşe cıyıldı. Tuğan mäktäpläre tantanasına dip ilneñ törle töbäklärennän törle yıllardağı çığarılış uquçıları häm uqıtuçılar qaytqannar.

Küp yıllar küreşmägän sıynıftaşlarnıñ elekkege uqıtuçıları belän bergä oçraşuları bik dulqınlandırğıç küreneş buldı. Annan soñ bar da elek uqığan sıynıflarına taralıştılar. Elekkege uqıtuçıları inde çäçläre çalarğan uquçılarına 15 minutlıq däres tä birep aldılar äle. Törle şayarulı istäleklärgä kümelgän simvolik däreslärdän soñ bar da awıl çitendäge yämle yalanğa, sabantuyğa dip äzerlägän kiñ mäydanğa yunäldelär.

Sabantuy bu yıl şulay üzençälekle itep başlandı. Başta mäktäpneñ olı yubileena bağışlanğan tantanalı miting buldı. Annan soñ balalar häm olılar cıyılğan qunaqlar aldında matur tatar konsertı quydılar. Ölkä üzägennän raxmanlılarnı bäyräm belän täbrik itärgä dip xalıqara cır konkursı lawreatı Nazıyf Arslanov üzeneñ konsert programmasın da alıp kilgän ide. Konsertnı xalıq bik yaratıp qabul itte.

Yekaterinburg şähärennän kilgän qunaqlar arasında Başqortstan Respublikasınıñ tulı wäqälätle daimi wäkile Näfisä Tyumenseva da bar ide. Näfisä xanım Sabantuy säxnäsenä büläk itep başqort qurayı moñı, başqort iyülläre alıp kilgän. Ä Raxmankul mäktäbe yubilee uñayı belän ul mäktäpkä tösle televizor büläk itte. Näfisä Tyumenseva sabantuyda iñ yaxşı başqort cırın başqaruçı bäygese oyıştırıp, ciñep çığuçığa 1000 sum külämendä aqçalata priz da bilgeläde

Şulay itep, Raxman awıl sabantuyı tatar-başqort mädäniätına kümelep, şaw-gör kilep ütte.

Äçit rayonı sabantuyın bu yıl olı yuldan çitkäräk qaçıp, quyı urman çitenä sıyınıp utırğan tatar awılı – Lämtedä ütkärdelär. Küñelle bäyräm bar qanunnarğa turı kiterep alıp barıldı. Bäyräm säxnäsendä kürşe-tirä tatar awıllarınnan kilgän üzeşçän sänğat ostaları çığış yasadı. Gäynädän kilgän bertuğan Sadıyqowlarnıñ ğailä ansamble çığışın xalıq bigräk tä yaratıp qabul itte.

Törle uyınnar, bäygelär, köräş belän barğan kütärenke Sabantuy käyefen beraz bertuqtamıy yauğan köçle yañğır ğına bozıp cibärgändäy buldı. Şuña qaramastan, sabantuy tämamlanmıyça, beräw dä taralırğa aşıqmadı.

Bu könnärdä Pervoural''sk şähäre tiräsendä urnaşqan awıl häm poseloklarda Sabantuy bäyräme aldınnan birnä cıyu yolası buyınça törle qızıqlı çaralar ütkärelä. “Ural moñnarı” häm “Turğay” ansaml''läre yegetläre häm qızları monıñ öçen tulı ber programma äzerlägännär. Maxsus ssenariy buyınça yasalğan programmada xalqıbıznıñ borınğı yolası qabatlanmas tirän maturlığı belän kürsätelgän. Milli kiemnärdän matur itep kiengän, ğarmun moñı astında uyın-kölke, şayan taqmaqlar, iyüllär belän yortlarğa yörep sabantuyğa birnä cıyıp yörüçe yäşlärne qayberäwlär yılmayıp, qayberäwlär soqlanıp, qayberäwlär ğacäplänep qarşı ala. Qaywaqıtta başqa millät wäkilläre dä üzlärennän büläk çığarıp birälär. Pervoural''sk sovxozı direktorı İwan Vladimiroviç Novosel''sev, mäsälän, büläk birep kenä qalmıyça, yäşlär belän bergä bu eştä qatnaşıp ta yörde äle.

Ğomumän, İwan Vladimiroviçnı Pervoural''sk tatarları küptännän üz itälär. Anıñ xatını tatar bulğanğamı, tatar xalqınıñ milli bäyrämnärenä härwaqıt yaratıp, teläp bulışa ul. Ramazan häm qorban bäyrämnärendä mäçetne dä onıtmıy, iten-söten-yäşelçäsen digändäy, gel birep tora. Qorban bäyräme citkäç, yıl sayın bäyrämgä dip ere mal suyıp, mäçetkä büläk itä.

Menä bu yulı da, zur däräcäle eştä eşläwenä qaramastan, anıñ yäşlär belän bergä bäyrämdä qatnaşıp yörüen tatarlar bik yaratıp qabul ittelär.

Birnä cıyu yolası küp urınnarda ütkärelmi inde xäzer. Yä oyıştıruçı lyuk, yä xalıqnı künekterü qıyın, yä tağın ber qomaçawlıq kilep çığa. Ä Pervoural''sk tatarlarınıñ milli-mädäni moxtäriäte nindi genä qomaçawlıqlar kilep çıqsa da bu yolanı matur itep başqarıp çığarğa tırışa. Moxtäriät räise Mösäwir Xösäyenow äytüençä, xalqıbıznıñ küñel cäwhärläre bulğan matur yolalarıbıznı saqlap qalu öçen böten köçebezne quyıp tırışırğa kiräk.

Yekaterinbur, Fäwiä Safiullina

XS
SM
MD
LG