Accessibility links

якшәмбе, 11 декабрь 2016, Казан вакыты 03:18

Amerikannar Saddamnı ezläw tırışlıqların canlata, ul Belaruskä qaça ala digän xäbärlär bar


Ğiraqnıñ elekke yuğarı citäkçeläre Belarus''kä qaçarğa omtıla ala - Saddamnıñ berniçä kön elek totqarlanğan şäxsi yardämçesendä tabılğan qayber dokumentlar şul xaqta söyli. Şundıy belderü belän Saddamnı tabu tiräsendäge yäşeren mäğlümatqa tayanıp ber cawaplı körd räsmi wäkile çıqtı.

Elekke Ğiraq diktatorınıñ şäxsi yardämçese Äbid Xämit Mäxmüt uzğan atnada amerikan köçläre tarafınnan, Saddamnıñ tuğan şähäre Tikrit yanında qulğa alınğan ide, xörmätle tıñlawçılar. Xäzer menä şul açıqlandı, anıñ üze belän elekke sovet respublikası, ä bügenge köndä bäysez däwlät sanalğan Belarus''neñ berniçä pasportı bulğan. Bu xaqta ber körd räsmi wäkile, Xoşyar Zebari belderde. Britaniäneñ İndependent basmasına ul, Saddam yardämçese äle genä Süriädän qaytqan bulğan häm ul anda, bälki Süriä xakimiatenä beldermi genä Belarus'' pasportların alğan dip xäbär itte. Mäğlüm ki, räsmi Minskineñ Waşington belän araları şaqtıy kiyerenke bulıp qala birä, Ğiraq suğışı waqıtında xätta Belarus''täge qayber däwlät şirkätläreneñ Ğiraq qorallı köçläre belän bäyläneşlären kürsätkän räsmi qäğäzlär dä tabılğan ide. Läkin belgeçlär fikerençä, Ğiraqnıñ elekke xakimiate wäkillärenä Belarus''kä qarağanda, kürşe Ukraina yäisä Rusiädä qaçıp yatu küpkä qulayraq, ä Belarus'' pasportnı nigezdä andıy mömkinleklärne birä. Yäğni andıy pasportqa iä bulu äle hiç kenä dä Saddam keşeläre Belarus''tä genä sıyınu taba ala digänne añlatmıy. Ul arada amerikan köçläre, uzğan çärşämbedä Ğiraqnıñ Süriä belän çigendä tar-mar itkän ber xärbi konvoyda kemnär buluwın açıqlawnı däwam itte. Ğiraq yağınnan kilgän şikle qaçaqlarnı ezärleklägändä Quşma Ştatlarnıñ maxsus köçläre Süriäneñ 5 çik saqçısın da yaralağan ide. Pentagon bäreleşlärneñ qaysı yaqta buluwı xaqında berni dä äytmi, barı tik, cirdäge amerikan xärbilärenä yardäm yözennän qaçaqlarğa Hercules xärbi boralağınnan ut açıldı dip kenä belderä. Süriälelärneñ näq menä şunıñ näticäsendä yaralanuwı bik ixtimal. Älegä qädär amerikan köçläre Süriä xärbiläre belän turıdan-turı bäreleşkä kergäne yuq ide. Waşington barı tik Damasknı terrornı yaqlawda häm Saddam keşelärenä sıyınu birüdä genä ğäyepläp kilde. Ezärleklängän konvoyda kemnär buluwına kilgändä başta, anda Saddam üze yäisä anıñ ulları buluwı bik ixtimal digän süzlär çıqqan ide, läkin Pentagon wäkilläre bu uñaydan, "monı tulısınça kire qağıp bulmıy, läkin raslağan dälillär dä yuq" dip belderä. Amerikan yağı şunı ğına tanıy, añarda çınnan da, xärbi konvoy belän Süriä çigenä taba Ğiraqnıñ elekke yuğarı citäkçelegenä kergän şäxeslär yul tota digän mäğlümat bulğan. Läkin monıñ döreslegen açıqlaw äle haman da mömkin tügel di Quşma Ştatlarnıñ xärbi citäkçelege. Älege waqıtta konvoyğa höcümneñ Ğiraq cirendäme, ällä inde anıñ Süriägä çığuwınnan soñmı yasaluwı tikşerelä. Amerikan xärbiläreneñ bu xaqta bik söylärgä telämäwen häm bigräk tä Süriä çik saqçılarınıñ yaralanuwın iskä alğanda, bäreleşneñ axırğı çiktä Süriä yağında buluwın abaylarğa bula. Damasktağı xökümät moña üz räsmi möğämäläsen beldermäde, Quşma Ştatlarnıñ däwlät departamentı da bu turıdağı sorawlarğa cawap birmi, qızıqsınuçılarnı barı tik saqlanu ministrlığına yullıy. Departamentnıñ monı Süriä yağı belän tikşermäwe, ber amerikan diplomatı süzlärenä qarağanda, Quşma Ştatlar xärbilärennän tieşle mäğlümatnıñ älegä alınmawı belän añlatıla.

Kärim Kamal, Praga.
XS
SM
MD
LG