Accessibility links

җомга, 9 декабрь 2016, Казан вакыты 18:31

Tatarstan prezidentı yaña toraq tözeleş programması turındağı qararğa qul quydı...


1996 yılda başlanğan tuzğan toraqnı beterü programması qısalarında respublikada barlığı 6 meñnän artıq ğailä fatir aldı. 2004 yılda bu programma tämamlana. Läkin anıñ belän Tatarstanda kiñ küläm tözeleş tuqtamıy. Şul uq 2004 yılda, respublikada yaña toraq tözü kompaniäse başlanırğa tieş. Tatarstan prezidentı qararı nigezendä, xäräbälärdä yäşämägän keşelärgä dä fatir satıp alırğa mömkinlek bireläçäk.

Mintimer Şäymievnıñ, 25 yündä matbuğatta basılğan qararında äytelgänçä, älege programmağa aqça tabu, xoquqı dokumentları äzerläw öçen respublika komissiäse oyıştırıla. Anıñ citäkçese itep xökümät räise urınbasarı Rawil Moratov bilgelänä, ä anıñ urınbasarları bulıp däwlät toraq fondı başlığı Tälğät Abdullin häm tözeleş ministrı Marat Xösnullin eşläyäçäk.

25 yün könne ,Tälğät Midxät ulı Abdullin «Azatlıq» radiosına birgän äñgämäsendä, yaña toraq tözeleşe programması turında tulıraq itep söyläde. Programmanıñ nigezendä fatirnı kreditqa birü prinsibı qaralğan.

İpoteka kreditı şuşı yaña toraq programmasınıñ ber yünäleşen genä täşkil itäçäk ikän. Tälğät Abdullinnıñ äytüençä, anda banktan ğadi kredit alıp tözetü, öleşläp tüläw, tulayım satıp alu ısulları da qaralaçaq. Bik az keremle sotsial qatlam wäkillärenä däwlät tä yärdäm itärgä mömkin.

Läkin bu programmanıñ bik küp bäxäsle yaqları bar. İpoteka Tatarstanda inde 1997 yıldan birle qullanılsa da, ul zur populyarlıq qazana almadı. Çönki banklar kreditnı 15%-lık isäp belän birä. Mondıy şartlarda alınğan açqanı qaytaru küplärneñ xälennän kilmi. Monı añlağan Federal ipoteka agentlığı Rusiä töbäklärendä ipoteka kreditın tübänräk protsent belän birergä röxsät itärgä bulğan.

Yaña tözelgän komissiä äğzäläre taşlamalı ipoteka häm ğadi kreditlarnı birü şartları turında da söyläşergä tieş bula. Şunıñ östäwenä, kemneñ çın mäğnäsendä däwlät yärdämenä moxtac ikänen açıqlaw da zarur. Toraq bazarında kvadrat metrnıñ bäyäsen bilgeläw dä, şulay uq, zur bäxäslär kiterep çığarır, dip farazlana.

Zur däräcäle çinovniklar, deputatlar, xoquq belgeçläre, iqtisatçılar, tözüçelär kergän yaña komissiä şuşı cäyge aylarda toraq programmasın äzerläyäçäk. Häm ul köz könne äzer bulıp, Däwlät şurasına täqdim itelergä tieş bula. Älege dokument tuzğan toraq programması tämamlanğaç, yäğni 2004 yılda ğämälgä kerer dip kötelä.

Bikä Timerova, Qazan.

XS
SM
MD
LG