Accessibility links

сишәмбе, 6 декабрь 2016, Казан вакыты 20:52

Narkomaniä tatar awıllarına da kerep bara...


Narkomaniä probleması böten dönyadağı kebek ük, Tatarstanda da şaqtıy kisken tora. Soñğı arada bigräk tä. Şuña kürä xäzer bu problemağa iğtibar da bermä-ber arttı. Şunısı quandıra, mäs’älä belän Xalıqara köräş könnärendä genä tügel, ä daimi räweştä şöğellänergä tırışalar. Xäyer, narkomaniä problemasın xäl itüdä kübräk törle cıyılışlar, konferensiälär, narkotiklarğa qarşı yünälgän tele häm radiomarafonnar ütkärüne xup kürälär. Bolar barısı da kiräk älbättä. Läkin narkomannar sanınıñ yıldan-yıl işäyä baruı, bu çaralarnıñ ğına wazğiätne üzgärtergä sälätle bulmawın kürsätä.

Ä tatar yäşlärendä bu problemağa nindi qaraşlar bar soñ? Alar bu turında ni uylıy? Şuşı xaqta fikerlärne beleşer öçen bez Qazan yäşläre arasında keçkenä genä soraşu ütkärdek. Yäşlärgä möräcäğät itüebez oçraqlı tügel. Ni disäñ dä, narkotiklar mäs’äläse berençe çiratta turıdan-turı alarğa bäyle bit. Bu xaqta tatar yäşläreneñ fikerläre menä mondıy

Bu problema turında ällä ni uylanğan yuq. Läkin narkomaniägä qaraşım tiskäre inde.

Minemçä, narkomannar üz bälälärendä üzläre ğäyeple. Läkin alarnıñ yaqınnarına bik awır, alar integä berençe çiratta

Bu bik möhim häm awır mäs’älä, minemçä ul tatar xalqın ğına tügel, başqalarnı da bik borçıy. Älege problema bezneñ cämğiätebezneñ bügenge xäle belän bäyle, dip uylıym

Bezneñ äñgämädäşlärebez fikerençä, bu problemanıñ tatar milläte öçen tağın ber ayanıç yağı bar.

Narkomaniä tatar awıllarına kerep bara. Ä tatarlarnıñ töp öleşe yäşägän awılda millätneñ nigeze saqlana bit. Minemçä, bu tatar milläte öçen bik zur qurqınıç

Yäşlär belän söyläşkändä bezgä tağın ber fiker işetergä turı kilde. Üzeneñ süzlären yazdırtırğa telämägän ber yeget, narkotiklarnı irken qullanışqa kertergä, legal’läşterergä kiräk, şunısız bu problemanı xäl itep bulmıy. Röxsät itmäw narkomannar sanın arttıra ğına, dip belderde. Xäyer, bu fikerdä ul yalğız tügel. Sotsiologlar ütkärgän soraşular şunı kürsätä, alda äytelgän fikerne şaqtıy yäşüsmer yaqlıy ikän.

Bezneñ söyläşüdä qatnaşuçı tatar yäşläre älege mäs’äläne çişü yulların niçek itep kürä soñ?

Keşeneñ üzennän tora inde, köçle keşe barısın da ciñep çığa ala. Ğailä dä bik zur rol’ uynıy. Balanı berençe çiratta ğailä tärbiälärgä tieş

Bu äfättän bezne tatarnıñ milli ğöref-ğädätlärenä qaytu häm islam dine genä saqlap qala ala. Balalarnı berençe çiratta milli, dini ruxta tärbiälärgä kiräk.

Narkomaniädän saqlanıp qalu öçen mäğlümät çaralarında yäşlärgä kübräk anıñ sälämätlekkä zıyanı, yış qına bu bäläneñ ülemgä kiterüwe turında añlatırğa kiräk.

Tatar yäşläre narkomaniä probleması häm anıñ belän köräş yulları turında menä şundıy fikerdä tora.

Gölnaz İlgizär, Qazan

XS
SM
MD
LG