Accessibility links

шимбә, 3 декабрь 2016, Казан вакыты 18:47

Köndälek xäbärlärgä küzätü...


Xäbärlärdä, Tatarstan hönärilär berlege başqarma komitetı utırışı turında, Tatarstanda narkomaniägä häm narkomafiägä qarşı köräş könenä mönäsäbät, BDTK başqarma komitetınıñ xoquq komissiäse Çiläbedäge millättäşlärebezne yaqlıy. Tatarstanda 26 yün könne bulaçaq çaralar isemlege saru qaynatqıç ozın. Anda Ğädättän tış xällär ministrlığı kollegiäse, Tatarstan hönärilär berlege başqarma komitetı utırışı, Qazan universitetı rektorınıñ uzğan uqu yılı öçen xisap totuına bağışlanğan cıyılış, “Kazanorgsintez” häm “Qazan boralaq zavodı” berläşmäläre aksionerlarınıñ yıllıq cıyılışları da bar. Älege çaralarda nindider açışlar, şaq-qatırğıç yañalıqlar turında süz barası digän xäbärlär işetelmäde. Bez sezgä xörmätle tıñlawçılarıbız Qazan byurosı xezmätkärläre qızıqlı dip saylap alğan çaralar häm temalar turında söylärgä niätlädek. Tatarstan hönärilär berlege başqarma komitetı utırışı buldı.Soñı öç ayda eş xaqı burıçları sizelerlek kimegän.

Şundıy ozın çaralar isemlege tözelgän eş könen Tatarstan mäğlümät çaraları narkomaniägä qarşı köräş temasınnan başladılar. Bu xalıq-ara narkomaniä häm narkomafiägä qarşı köräş könenä reverans ide. Qazan byurosınıñ bu köngä reveranslar yasap torası yuq. 19 yün könne Tatarstanda xalıqnıñ bu problema belän qızıqsınu däräcäse, narkomaniägä qarşı köräşneñ üzençälekläre turında berniqädär söylägän idek. Törle yaqlarda sibelep yäşägän millättäşlärebez, yäşe-qartı nilär genä kürmilär dä, nilär belän genä köräşmilär. BDTK başqarma komitetınıñ xoquq komissiäse utırışında Çiläbe ölkäsendäge millättäşlärebezneñ xoquqları öçen köräşülärendä yärdäm çaraları turında kiñäştelär.

Monıñ xaqında täfsilleräk itep aldağı xäbärlärebezdä.

Mädäniät yañalıqları.

26 yün könne Ministrlar Kabinetında Musa Cälil büläklären tapşıru tantanası buldı. Mäğlüm ki torğınlıq yıllarında bu büläk Kommunistlar partiäse häm xökümät büläge dip partiä äğzäse yä komsomol yazuçılarğa şağirlärgä birelä ide. Ä xäzer ul ike yılğa ber 40 minimal' xezmät xaqı külämendä Tatarstan xökümäte büläge itep birelä. Şuşı yañartılğan büläk Mägärif näşriäte direktorı Mödäris Wälievkä, cırçı Salawat Fätxetdinovqa, Oteçestvo berläşmäse häm Sälät yäşlär waqıfına tapşırıldı. Häm soñğısı. Altın Qäläm 8 respulika yäşlär matbuğatı isän imin Qazanğa äylänep qayttı. Altın Qälämgä Qazannan yäş jurnalistlar Dinä İmanqulova häm Klim Palexa, ä “Tatar jurnalistikası” nominatsiäsendä Balıq Bistäse rayonınnan Röstäm İsxakov layıq buldılar dielä räsmi xäbärdä.

Yunıs Ätnäle.

XS
SM
MD
LG