Accessibility links

чәршәмбе, 7 декабрь 2016, Казан вакыты 17:33

Xezmät xaqı burıçları kimi...


Xezmät xaqı burıçlarınıñ küläme, soñğı 3 ay belän çağıştırğanda, şaqtıy kimegän. Yün ayı sannarına qarağanda, birep beterelmägän aqçanıñ küläme 714 million sum tiräsendä, dip isäplänä. Bu may ayı belän çağıştırğanda 102 million sumğa azraq ikän. Pänceşämbe könne hönär berlekläre federatsiäse binasında başqarma komitet utırışı buldı. Anda xezmät iäläreneñ xoquqların yaqlawçılar cıyılıp, eşlägän tarmaqları turında fiker alıştı.

Xezmät xaqın tülämäw mäs’äläse äkrenläp xäl itelep kilsä dä, xezmät iäläreneñ xäle barıber maqtanırlıq tügel. Däwlät statistika komitetı birgän mäğlümätlarğa qarağanda, 2 balalı ğailägä isäplägändä, Tatarstanda, minimal qullanu byudjetı 4 000 - 4 800 sumnı täşkil itä. Ä keremnärne bülgändä, ber keşegä, mäsälän may ayında , 3 696 sum turı kilgän. Bu san, 2003 yılnıñ uzğan ayları belän çağıştırğanda, 21% artqan ikän.



Sänäğät şirkätlärendä – 234 million, tözeleştä 88, ä sotsial ölkädä barlığı 40 million yarım sumlıq burıçlar cıyılğan. Aqça tülänmi torğan ölkälär isemlegendä awıl xucalığı berençelekne alıp tora. İñ soñğı mäğlümätlarğa qarağanda, respublika awıl xezmätçännärenä 402 million sum birelergä tieş. Şul uq waqıtta, sänäğät, tözeleş, transport häm awıl xucalığında burıçlarnıñ küläme 15% kimegän.

Şuşı qorı sannar artında qayğılı da şatlıqlı da keşe yazmışları yata. Aqçasız yäşi torğan häm tañ atqannan töngä qädär eşli torğan awıl apaları belän Qazannıñ Çexov bazarında söyläşep aldıq. Alar Piträç rayonınıñ Şäle awılınnan kilgän:



Bez eremçek, qaymaq satabız. Anıñ öçen tönge 3tän torıp monda kilergä kiräk. Böten awıl şulay yöri, şulay kön kürä. Kümäk xucalıqta aqça birmilär. Saban tuyğa 100-är sum birep çıqqannar ide. Yarıy inde anısı da, ipi-tozlıq bulğaç. Kümäk xucalıqta kerem bulsa - aqçasın birä, ä äyber sata almasa – birmi inde.

Bazarda satuçı apalar da kümäk xucalıqlarınıñ iqtisatı turında xäbärdar, andağı keremnärne dä, çığımnarnı da çamalıy. Bälkem şuña da, alar böten cirdä yäşäwläre awır, dip citäkçelären gäyeplämi. Ä citäkçelär isä eçlägän aqçaların waqıtında alıp bara. Şul uq däwlät statistika komitetı mäğlümätlarına qarağanda, idärä häm militsiä oyışmalarında eş xaqı totqarlanmıy tülänä.

Bikä Timerova, Qazan.

XS
SM
MD
LG