Accessibility links

шимбә, 3 декабрь 2016, Казан вакыты 18:50

Musa Cälil isemendäge premiä tatar millätenä üseşenä küp öleş kertkän şäxeslärgä birelde...


Pänceşämbe könne Ministrlar Kabinetında 2003 yılda Musa Cälil isemendäge premiä lawreatların büläkläw buldı. Bilgele bulğança, älege premiä ike yılğa ber, sänğät, fän, tärbiä, mäğärif üseşenä şäxsi öleş kertkän, yäşlär eşmäkärlege, yäşlär programmaların tormışqa aşıru ölkäsendäge uñışlar öçen tapşırıla. Äytergä kiräk, bıyıl premiä tatar milläte üseşenä küp öleş kertkän şäxeslärgä birelde. Anıñ külämenä kilgändä 40 minimal' xezmät xaqı. Häm ul dürt nominantqa birelde.

Premiä tapşıru komitetı qararı belän 2003 yılda lawreat iseme yäş talantlı avtorlarğa yärdäm kürsätkäne häm original' uqıtu-metodik, balalar ädäbiät seriäläre çığarğanı öçen "Mäğärif" milli näşriät Mödärris Wälievkä, yäşlär arasında tatar cır sänğäten populyarlaştırğanı, aktiv xäyriä eşçänlege öçen "Salawat" cır teatrı citäkçese Salawat Fätxetdinovqa, yäşlärne grajdanlıq-patriotik tärbiäläw, Böyek Watan suğışı qaharmannarınıñ istälegen mäñgeläşterü eşe öçen Tatarstannıñ "Watan" berläşmäse" ictimaği yäşlär oyışmasına häm sälätle balalarnı häm yäşlärne ezläw häm alarnıñ sotsial'-psixologik caylaşu sistemasın eşlägäne öçen "Sälät" Tatar respublika yäşlär ictimaği fondına birelde.

Tantanada premiägä layıq bulğan milli "Mäğärif" näşriäte direktorı Mödärris Wäliev büläkne qulına alıp: "Min bu büläkne berençe çiratta, älbättä, tatar kitabın olılaw dip qabul itäm. Çönki bezneñ xalıqta kitap süze härwaqıt däräcäle sanalğan", - dide. Äytergä kiräk Mäğärif näşriäte Rossiä Federatsiäseneñ tatarlar küpläp yäşägän töbäklären tatarça däresleklär häm balalar ädäbiät belän tä'min itügä zur iğtibar birä. Bu eş Başqortstan Respublikası, Perm häm başqa töbäklärdäge mäğärif oyışmaları belän näşriät arasındağı turıdan-turı kileşülär nigezendä alıp barıla. Soñğı yıllarda Tatarstan çittäge töbäklärgä 500 meñnän artıq däreslek, uqu-uqıtu häm metodik ädäbiät cibärelgän.

Cırçı Salawat Fätxetdinov tantanada qatnaşuçılarnı üz konsertlarına çaqırdı. "Watan" cämğiäte wäkilläre häm "Sälät" fondı räise Cäwdät Söläymanov xökümätneñ ictimaği oyışmalarğa yärdäm itüenä räxmät belderde.

Landış Xarrasova, Qazan.

бәйле язмалар

XS
SM
MD
LG