Accessibility links

якшәмбе, 4 декабрь 2016, Казан вакыты 15:15

AQŞ xärbiläre Ğiraq qarşılıq köçläre äğzaların ezli


Soñğı könnärdä AQŞ köçläre Ğiraqnıñ üzäk öleşlärendä amerikan xärbilärenä keçkenä höcümnär oyıştıruçı Ğiraq qarşılıq köçlärenä qarşı çistartu operatsiäse ütkärde. Bu operatsiä qayber uñay näticälär birsä dä, kötelgän uñışqa ireşelmäde diärgä bula.

Yäkşämbe könne Bağdadnıñ tönyağında AQŞ xärbiläre Ğiraq qarşılıq köçlärenä kiñküläm höcüm başladı. Biredä, birgräk tä uzğan atnada, Amerikan xärbilärenä kötelmägän höcümnär könnän-kön arta barğan ide. Bağdadta häm Ğiraqnıñ üzäk öleşlärendä şundıy höcümnär näticäsendä yartı distädän artıq amerikan soldatı hälak buldı. Uzğan atnada urlap alıp kitelgän ike soldat atna axırında üle kileş tabıldı. Comğa könne Bağdad bazarına çıqqan ber amerikan xärbien başına atıp üterdelär. Amerikannarğa qarşı granataatqıçlar häm minanalar belän dä höcümnär bulğalap tora.

Şundıy höcümnär oyıştıruçılarnı ezläw operatsiäsendä 27 meñläp soldat, yözlärçä tank häm xärbi maşina qatnaşa. Operatsiä tönge säğät ikedä başlandı. Tönlä oçqıçlar paraşut belän hawağa sülpän ut cibärä. Alar xärbilärgä qarañğıda kürü cihazlarına citärlek kenä yaqtılıq birä. Bu operatsiä beryulı berniçä urında bara. Säddam Xösäin tarafdarı dip şiklänelgän keşelärneñ yortları häm andıylar yäşerengän bulırğa mömkin binalar tikşerelä. Bügen Amerikan xärbi citäkçelege kiçädän birle barlığı 320-läp ğiraqlınıñ totqarlanuın xäbär itte. Alar arasında Säddamnıñ Baat patiäsenä kergän ber polkovnik ta bar dielä. Ämma älegä iñ nıq qulğa alırğa telägän keşelär isemlegennän berärseneñ totılu turında xäbär yuq. Bu operatsiädä qorallı qarşılıqnıñ çağıştırmaça az buluı isä qarşılıq köçläreneñ töp öleşe äle tabılmağan dip äytergä nigez bula ala. Bu operatsiä aldağı könnärdä dä däwam itär dip kötelä. Älegä AQŞ xärbiläre arasında yaralanuçılar yäki ülüçelär yuq. Şulay da kiçä Bağdadqa AQŞ xärbilärenä kötelmägän höcüm näticäsendä 2 soldat yaralanğan.

New York Times gazetı xäbär itüençä, bu operatsiä xärbi küzläw xezmätläre kötkän näticälärne birmägän. Mäs''älän, elek şiğilarnıñ Badr suğışçan törkeme urnaşqan urında xärbilär barı tik, yortsızlıqtan anda yäşäwçe ike ğailäne genä tapqan.

Başqa ber urında Ğiraqnıñ Ässät Adin isemle yuğarı küzläw ofitserın totarğa dip ber awıl yortına barğan xärbilär isä Adinnı taba almağan. Anda bulğan 14 keşeneñ qulların boğawlap, başlarına qapçıq kigerep alıp kitkännär, ämma soraw alulardan soñ alarnıñ 11-e, şul isäptän Adinnıñ tuğanı irekkä çığarılğan.

Säddam Xösäinneñ isänme yuqmı ikänlege, isän bulsa qaydalığı haman da bilgesez qala birä. Ğiraqtağı AQŞ administratsiäse başlığı Paul Bremer "Min haman da ul Ğiraqta dip uylıym, Bez anı totaçaqbız. Anıñ yäşerener urınnarı küp, ämma bez anı totaçaqbız" dip belderde. Bremer ike atna elek Säddamnıñ uñ qulı, qulğa alınırğa tieşlelär isemlegendä dürtençe urında torğan Abid Xämit Mäxmüt Tiqritinıñ qulğa alınuın äytep "elmäk qısıla bara" dide.

Bremer äytüençä, soñğı atna-un kön eçendä Ğiraqlılar arasında yaña küreneş başlanğan. Ğiraqlılar, bigräk tä olı yäştägelär amerikalılar yanına kilep kemnärneñ Baatçı buluı, qarşı çığuçılarnıñ qayda yäşäwen äytep birä başlağan. Moñarçı mondıy xezmättäşlek yuq ide di Bremer.

Bu operatsiä 1-nçe maydan birle oyıştırılğan şundıy çaralarnıñ öçençese. İkençese 2 atna elek tä oyıştırılğan ide. Ul çaqta 500-läp mıltıq häm aftomat, 124 raketaatqıç häm başqa tör qorallar tabıldı. Bu yulı isä älegä berniçä distä qoral tabıluı ğına mäğlüm.

Naif Aqmal, Praga.
XS
SM
MD
LG