Accessibility links

якшәмбе, 4 декабрь 2016, Казан вакыты 09:06

Penza tatarları tormışına da sabantuyı kerde


Elekke zamannarda mişärlärdä sabantuy bulmağan, alarnıñ cäy waqıtında ütkärelä torğan üz bäyrämnäre bulğan. Penza ölkäseneñ qayber awıllarında iyün waqıtında äle dä Qır keläwe, Yärilä digän bäyrämnär ütkärelä. Ämma sowet waqıtında äkrenläp mişär awılları da saban tuyğa öyränä bardılar häm äle Tatarstan respublikınıñ yärdäme belän Penza ölkäsendäge sabantuylar elek qayçan da bulmağan däräcädä ütkärelä başladı. Mäsälän, 21 iyündä Sabantuyı Ğorodıyşçe rayonınıñ Urta Äläzän awılında uzdı. Bu sabantuynı oyıştırırğa Tatarstannıñ Aznaqay rayonı yärdäm itkän – monda 700 kilometrdan artıq yul ütep 110 keşelek deleğätsiä kilgän: artistlar, sportçılar, xätta üz sud'yälärın da kitergännär. Äläzän xalqın Tatarstan prezidentı isemennän Aznaqay rayonı başlığı Änäs İsxaqov qotlağan. “Äläzän” ağrofirması başlığı Qyazıym Deberdiev Tatarstan qunaqlarına zur räxmätlären beldergän häm üz awılın mişärlärneñ başqalası dip dä atağan ikän. Ä inde 29nçe iyündä ölkäneñ başqalası Penzada sigezençe märtäbä ölkä sabantuyı görläp ütte. Penzada saban tuyın uzdırırğa Tatarstannıñ Apas rayonı deleğätsiäse yärdäm itte. Saban tuyı irtä belän 11 säğät tulğanda başlanıp kitte. Penza şähäreneñ Belinskiy isemendäge parqında, az-maz sibäläp quyğan yañğırğa qaramastan, bik küp xalıq cıyılğan ide. Monda Penza şähärendä yäşäwçe tatarlar da, törle rayonnardan kilgän qunaqlar da ide. Ölkä ğubernatorı Wasiliy Boçqärev parkta cıyılğan tatar xalqın Saban tuyı bäyräme belän qotladı. Wasiliy Qüzmiç Saban tuyında kiçke säğät 4-kä qädär buldı. Şul waqıtta, Tatarstan qunaqların ozatqaç, xalıq tarala başladı häm parkta disqoteqada qatnaşır öçen yäşlär genä qaldı. Saban tuyı bik yaxşı ütte, tämle aş-sular, tatar kitap-qassetaları satıldı, Tatarstannan kilüçe häm Penza ölkäseneñ üzeşçän artistları cırlar cırladı, köräşçelär köräşte, ciñüçelär telewizor aldı, ger kütärüçelär dä, bağanağa menüçelär dä büläksez kitmäde. Tatarstannan kilgän qunaqlar qatnaşı Penza Saban tuyınıñ däräcäsen bik yuğarı kütärde. Tatarstannan çittä yäşägän tatarlarğa saban tuyları oyıştıruda yärdäm inde Tatarstannıñ däwlät politiqäsına äwerelä bara kebek. Bu bik kürkäm närsä kiläçäktä dä däwam itsen ide.

İrek Bikkinin, Penza

XS
SM
MD
LG