Accessibility links

шимбә, 3 декабрь 2016, Казан вакыты 20:36

«Tatarstan - yaña ğasır» xäräkäte «Berdäm Rusiä» häm uñ köçlär belän xezmättäşlek itärgä uylıy.


«Tatarstan yaña ğasır» xäräkäte saylawlarda möstäqil räweştä qatnaşa almasa da, mondıy cawaplı eştän çittä qala almıy. 27 yündä Däwlät şurası räise häm «Tatarstan-yaña ğasır» isemle respublika ictimaği xäräkäte räise Färit Möxämmätşin jurnalistlar belän oçraşıp, qayber mäs’älälärgä mönäsäbäten belderde. Federalizmnı häm Tatarstannıñ suverenitetın yaqlıy torğan xäräkät, dip tanılğan «Tatarstan-yaña ğasır» saylawlarda da şundıyraq qaraşlarda torğan säyäsi köçlär belän berläşergä uylıy. Täcribäle säyäsätçe bularaq, Färit Möxämmätşin kiläçäk partnerları turında tögäl genä cawap birmäde. «Köz könne äyterbez» dip kenä qotıldı. Läkin, «Jirinovskinıñ LDPR häm Zuganov kommunistları belän eş itmäyäçägebezne hiç ikelänmi äytä alam», dip belderde ul. Mömkin fikerdäşlär arasında ul «Berdäm Rusiä» firqäsen häm uñ köçlärne atadı.

Sotsiologiä belgeçläre, bu könnärdä genä, xalıqnıñ säyäsi qaraşların tikşerep çıqqan ikän. Şuşı xezmättä äytelgänçä, «Tatarstan yaña ğasır» xäräkäte yaqlağan säyäsi firqä öçen 37 meñ keşe tawış birergä riza. Bälkem şuña da Färit Möxämmätşin kiläçäkkä ömet belän qarıy. Säyäsi sezon başlanğaç, xäräkät, küñelenä xuş kilgän firqäne genä tügel, ayırım nämzätlärneñ isemnären dä iğlan itäçäk, dide Färit Xayrulla ulı. Şuşı xikmätle isemlekkä eläkkän nämzätlärgä xäräkätneñ rayonnarda, awıllarda bulğan bülekçäläre dä yärdäm itäçäk, matbuğatta da, xäräkät häm Färit Möxämmätşinnıñ isemenä sıltap öndäw kampaniäsen alıp baru ciñelräk bulır.

Säyäsi firqälär turındağı qanun nigezendä, kiläçäktä Tatarstan parlamentında da firqä häm xäräkät wäkillärennän torğan törkemnär bulaçaq. Bu oçraqta Berdäm Rusiä firqäseneñ tarafdarları – Mäskäwdä genä tügel, respublika parlamentında da eşliyäçäk. Ä firqädäge tärtipne iskä alğanda, bu deputatlarnıñ niçek tawış birüen dä farazlap bula. Şunı istä totıp Färit Möxämmätşin Tatarstan parlamentında ber genä tügel, ä küp törle firqälärneñ qatnaşuın teli.

Tatarstan parlamentında älegä qädär saylawlar turında tügel, ä cäyge yal turında kübräk uylıylar. 17 yüldän bu sezonda soñğı utırış bula. Ä aña qädär, parlamentta, Evropa Berlege qatnaşlığında «Rusiä töbäkläreneñ statusı» digän konferensiä ütkäreläçäk. Färit Möxämmätşinnıñ äytüenä qarağanda, Rusiä töbäkläreneñ konstitutsion xoquqlarına bağışlanğan bu konferensiäneñ näticälärenä Mäskäw säyäsätçäläre häm xakimiät oyışmaları küz yomıp kitä almayaçaq.

Bikä Timerova, Qazan.

XS
SM
MD
LG