Accessibility links

Кайнар хәбәр

Mäglümatsız qalğan waqiğalar


Mäğlümätsez, serle bulıp qalğan waqiğalar tağı bar ele. Berençese – uzğan atna axırında cırçı Alsu Safina tuğan könen niçek ütkärde häm anıñ yanındağı tatar bulmağan yeget nindiräk keşe ikän? Tatarğa çıqmıym dip, ätise belän bäxäsläşkän Alsuğı tatar yäşläre bik qızıqsınıp qarıy.

Tağın ber mäğlümätsez tema. Atom radiätsiäsenä qarşı şimbä könne başlanğan protest marşı niçegräk ütä, ul qaya barıp citkän, aña räsmi xakimiät niçek qarıy. Nişläpter älegä mondıy mäğlümlät yuq. Ällä jurnalistlar yalqaw, ällä inde teması bik çeterekle. Tağın ber xäbärsez sara çara – Ayşä awılı tiräsendä ütkän turistlar häm bard cırları bäygese.

Üzläre icat itkän cırlarnı başqaruçılarnıñ tabiğät qoçağında ütä torğan festivalendä 10 meñ keşe qatnaşqan. Köne-töne cırlar, şiğerlär yañğırıy, quaq töbendä, yar buyında romantiklar tulıp yata. Şiğer häm cırğa 10 meñ keşe beryulı tabınğaç, bu zur mädäni häm ictimaği waqiğa ikäne kürenep tora. Rusiä Duması deputatı, fraksiä citäkçese Oleg Morozov ta şul tamaşada qatnaşıp, düşämbe könne tıynaq kenä Mäskäwgä oçqanın kürep qalğannar. Ä reklama häm PR kampaniäse xäzergä kürenmi. Dimäk, Yedinaya Rossiä firqäseneñ säyäsi texnologları monı kürsätergä ölgermägän yäki kiräk tapmağan. Wallahi-billähi, hiçkem tik yatmıy bu dönyada.

Bötendönya tatar kongressınıñ xoquq törkeme yañadan Çiläbegä barıp, anda radiatsiägä qarşı ütkärelgän konferensiädä qatnaşa. Xoquq komissiäseneñ comğa könne ütkän utırışında kongressnıñ xoquqçısı Roza Färdieva häm yazuçı Fäwziä Bäyrämova äytkän süzlärgä qolaq salırğa mömkin.

Başqortstan tatarlarınañ qorıltayında Qazannan kem qatnaşuı äle bilgesez. Şul uq comğa könne tatar kongressında ütkän kiñäşmädä Başqortstan temasın tikşerü kiçekterelde. Ufadan räsmi mäğlümlät yäki çaqırular xäzergä kilmägän ikän.

Axırda tağın ber säyäsi çara turında. 3 yüldä Qazanda Töbäklär üseşe strategiäse digän temağa bik zur däräcädäge konferensiä açıla. Anı Bol'şaya Volğa-Zur İdel assotsiätsiäse ütkärä.

Rimzil Wäli.
XS
SM
MD
LG