Accessibility links

пәнҗешәмбе, 8 декабрь 2016, Казан вакыты 07:02

1 yüldän ğämälgä kertelgän qanunnarğa Tatarstanda mönäsäbät...


Mäğlüm ki Rusiädä 1 yüldän avtomobillär xucaları öçen avtograjdanlıq cawaplılığı iminlege turında qanun ğämälgä kertelde. Tatarstanda da yañalıqqa qarata sorawlar meñdä ber. Berençe çiratta älbättä matdi yağı. Xäzer bezdä un yıllıq “Жигули”, “Москвич” avtomobillären 10 meñgä dä, xättä 5 meñgä dä alıp bula. Menä şundıy avtomobil'ne “keşe” itep yörtkän abzıylarğa xäzer yılına 2 meñ çaması ( äle tögäl belgän keşe yuk) avtostraxovqa, yäğni avtomobil' iminiäte tüläteläçäk. Häm monı ber kemneñ dä “ ay- wayına” qaramıyça qıçqırdırtıp alaçaqların xalıq belä. Şuña kürä uzğan aynı däwlät avtoinspeksiäseneñ Qazandağı terkäw üzägeneñ yanına kilerlek tä tügel ide. Xalıq yaña qanun, dimäk yaña tüläwlär kertelgänçe satasın satıp, isäptän alınasın isäptän alıp, isäpkä quyasın isäpkä quyarğa yabırıldı. Çönki bıyıl monıñ işe yañalıqlarda ber awız peşte inde. Yaña transport salımı kertelgeçtä Däwlät avtoinspeksiäse salımnı tülägän kvitansiä kitermiçä avtomobil' xucalarına berni dä eşlämäs buldı. Yarıy äle mäğlümätlär bankı bulmaw säbäple bu mäs'älä üzennän- üze körçekkä kerde. 1 iyüldän xalıq öçen möhim tağın ber qanun ğämälgä kertelde. Ul Rusiä Armiäsenä rekrutlar alu tärtibenä üzgäreşlär kertü. Mäğlüm ki monnan soñ armiägä narkomannarnı, SPİD belän çirlelärne häm gomoseksualistlarnı almayaçaqlar. Ministrlar Kabinetınıñ sişämbe brifingınıñ berençe öleşe şuşı yañalıqqa bağışlandı. Brifingnı alıp baruçı xärbi komissar Rim Mustaev başta armiägä yäşlär çaqıru, rekrutlar cıyu problemasınnan başladı. Xäzerge köngä Tatarstanda 1150 yeget armiädän qaçıp yöri. Alarnıñ armiägä yaraqlımı-yukmı ikäne bilgesez. Çönki alar xärbi komissariatqa kilmilär, meditsina komissiäse uzmıylar. Yaña zakonnar şundıylarğa armiädän qalırğa tağın ber qanuni yul açarğa tieş. Küptän tügel al'ternativ xezmät turında qanun qabul itelgäç çaqıru komissiälärenä alternativ xezmätkä 41 keşedän ğariza alınğan. Alar barısı da qänäğätländerelgän. Nigä alar az soñ? Qaçıp yörüçelär küp bit. Çönki älege qanunnı başqaru mexanizmı yuq. Brifingta sorawlar birgändä qanunnarnı ütäw, ütämäw mäsäläse kiskenläşte. Nigä qaynar noqtalarğa, Çeçnägä yäş soldatlarnı alu däwam itä digän sorawdan soñ xärbi komissar yuğaraq tonğa küçte. Audio. Yäğni Rim Mustaev yäş soldatlarnı qaynar noqtalarğa cibärmäw qanunı eşli di. Yartı yıl xezmät itmägän soldatlarnı üz telägennän başqa beräw dä Çeçnyağa cibärä almıy. Läkin 19-20 yäşlek yegetlärne patriotik xislärdän beräwdä tıya almıy. Yäş soldatlar qayber oçraqta xättä ata-analarınnan yäşeren üz ixtiarları belän qaynar noqtalarğa kitälär ikän. Xäyer yuğarı materiälärdän yaña qanunğa äylänep qaytıyq äle. Bu qanunnı da ütäw mexanizmnarı äle bilgele tügel. Terkälmägän narkoman, yä SPİD belän çirle armiägä barmas öçen çiren tanırmı. Yalğan gomoseksualistlar päydä bulmasmı. Xärbi komissariat narkomannar, SPİD çirlelär arqasında rekrutlar kimer dip qurıqmıy. Yäş rekrutlar arasında xärbi komissariat ütkärgän sotsiologik tikşerenülär narkomannar häm SPİDlılar soñğı öç yılda 2 märtäbä kimegän digän näticä birgän.

Yunıs Ätnäle.

XS
SM
MD
LG