Accessibility links

чәршәмбе, 7 декабрь 2016, Казан вакыты 19:34

Litwa aşa Kaliningradqa baruçı Rusiä watandaşları öçen 1 yüldän yaña qağidälär kertelde


Kaliningrad ölkäsenä baruçı Rusiä watandaşları Litwa aşa ütü öçen xäzer yaña maxsus röxsät qäğäzläre alırğa tieş, yülneñ 1-ennän ğämälgä şundıy tärtip kertelde. Litwanıñ kiläse yılda Yewropa Berlegenä quşıluwı arqasında kertelgän şuşı yaña tärtip Rusiägä bik oşamasa da, ul monıñ belän kileşergä mäcbür qaldı.

Rusiä-Litwa çigen yañaça ütüneñ inde berençe köne ük cäncallar belän bilgelände, xörmätle tıñlawçılar. Yaña qağidälär sişämbegä qarşı töndä ğämälgä kergännän soñ Litwa çik saqçıları, Rusiädän Kaliningradqa baruçı berençe 4 poyezdan uq 60-lap keşene töşerep qaldırdı. Alarda, Litwa aşa ütüne röxsät itkän yañaça äzerlängän qäğäzlär bulmağan. 1-nçe yüldän başlap Kaliningradqa baruçı Rusiä watandaşları, 24 säğät eçendä birelä torğan häm küptapqırlı vizalarnı xäterlätkän maxsus röxsätkä iä bulırğa tieş, annan başqa kiläse yılda Yewropa Berlegenä quşılaçaq Litwa Rusiä watandaşların il aşa ütkärmäyäçäk. Vilnyüstän alınğan belderülärgä qarağanda, sişämbe irtän Kaliningradqa ütü röxsäte birelmägän keşelärdä ğomumän yaña qağidälär xaqında mäğlümat bulmağan. Şulay itep Litwa räsmiläre, çik buyında kilep tuğan kierenkelek öçen cawaplılıqnı üzennän töşerep, monı tulısınça Rusiä yağına yökläde. İlneñ tışqı eşlär ministrı Antanas Valionis "France Press" agentlığına, "älbättä qayber problemalar bula ala häm berniçä keşegä Litwa aşa ütü röxsäte birelmäde, ämma bolar barısı da, añlap citmäw häm Rusiä yağında mäğlümat citep betmäw arqasında tuğan texnik problema ğına bulıp tora" dip belderde. Çik aşa ütü öçen yaña tärtip kertüne Litwa üze, möstäqillegen yaqlaw ölkäsendä zur qazanış dip bäyäli. Elek Kaliningradqa baruçı urıslar ilne bernindi vizasız ğına ütep kitä ide. Älbättä, Litwada yasalğan tuqtalışlarda qayberäwlärneñ ildä qalu oçraqları da buldı. Xäzer isä, kiläse yılnıñ mayında Yewropa Berlegenä kerergä torğan, soñraq eçke çiklärne betergän Schengen kileşüwenä dä quşılırğa telägän Litwa üzeneñ Rusiä belän çiklären nığıtırğa mäcbür. Bu Yewropa Berlege basımı belän dä eşlänä. Mäskäw isä soñğı köngä qädär elekke xälne saqlawnı, üz watandaşlarına Litwa aşa irekle ütü xoquqın yaqlap kilde. Prezident Putin xätta xökümäteneñ strategik maqsatı itep Rusiä watandaşlarına Yewropa illärenä vizasız säyäxät itügä ireşüne dä quyğan ide. Läkin Mäskäw bu mäs''älädä alğa kitä almadı, xäzer inde anda, Kaliningradqa baruçılar öçen oçqıç bäyälären arzanraq itü häm diñgez aşa kilü möminleklären qaraw tırışlıqları yasala. Viza suğışında Rusiä älegä ottıra, Baltıq buyındağı qalğan ike il Latviä häm Estoniä urıs watandaşlarına vizalarnı inde küptännän kertkän ide, üktäbrdä Kaliningradta yäşäwçelär öçen viza çikläwlären anıñ belän çiktäş ikençe ber däwlät, Pol''şa da kertergä cıyına. İkençe dönya suğışına qädär german cire bulğan, Koenigsberg isemen yörtkän Kaliningradqa xäzer diñgez häm hawa transportı belän genä irekle kilep bulaçaq. 2004-neñ mayında Rusiä ölkäse sanalğan şuşı töbäk tulısınça Yewropa Berlege çolğanışında qalaçaq. Rusiä-Litwa çige aşa ütüneñ yaña tärtibe niçek ğämälgä quyıluwın qaraw öçen berençe yulçılar belän anda Rusiä prezidentınıñ Kaliningrad mäs''äläse ölkäsendäge maxsus wäkile Dmitri Rogozin, Yewropa Berlegeneñ Mäskäwdäge ilçese Richard Wright ta säyäxät itte.

Kärim Kamal, Praga.
XS
SM
MD
LG