Accessibility links

якшәмбе, 4 декабрь 2016, Казан вакыты 13:07

«Berdäm Rusiä» firqäse saylawlarğa äzerlänä başladı...




1 yüldä, firqäneñ Tatarstan bülegendä matbuğat klubı açıldı. Jurnalistlar belän oçraşular daimi bulaçaq, dip iğlan itelde. Mäsälän, kiläse utırış 17 yüldän soñ planlaştırılğan. Firqäneñ respublika bülege citäkçese Yuriy Näcmiev, jurnalistlar aldında çığış yasağanda, saylawlar kön tärtibenä mende, dip belderde. Älege matbuğat oçraşuında Tatarstannan saylanğan deputatlar Färidä Ğäynullina, Mixail Rokitsiy, Nail Xösnetdinov eşlägän eşläre turında xisap tottı. Alar barısı da Dumada «Berdäm Rusiä» firqäseneñ tarafdarları bulıp tora häm tawış birgändä dä partiä mänfäğätlärennän çığıp eş itä, küräseñ. Mixail Rokitsiy da, Färidä Ğäynullina da nindi qanunnar östendä eşläwläre turında söylägändä, «bezneñ partiäbez» dä bu mäs’älälärne qayğırta, dip täqrarlap tordı. Mixail Rokitskiy, gäzit xäbärçelärenä, nigä bezneñ partiäne räncetäsez, usal çağıştırular qullanasız, dip üpkäsen belderde. Şunı ğına kötkändäy jurnalistlarnıñ berse şaw-şu kiterep çığarğan belderü yasadı: partiägezdä ayırım-ayırım şäxeslär bar, ä firqä üze yuq, dide ul. Firqä citäkçelege bu mäsälägä cawap birmäde.

Ä rayon jurnalistı birgän häm « Xakimiät başlıqları xalıqnı partiägä quıp kertep, firqägä tiskäre mönäsäbät tudırmıylarmı?» digän sorawğa citäkçelek üz süzen äytte. «Şäymiev qaya, xalıq ta şunda bara» -, dide Yuriy Näcmiev. Ğomumän, jurnalistlarğa uñaysız sorawlar birmäskä, «Berdäm Rusiä» belän konstruktiv xezmättäşlek itärgä kiñäş itelde.



Matbuğat oçraşuında «Berdäm Rusiä»neñ «Tatarstan yaña ğasır» ictimaği xäräkäte belän nindi şartlarda «nikaxlaşuı» turında da süz buldı. «Berdäm Rusiä» wäkile Mixail Rokitskiy, bu sorawğa cawap yözennän, älege xäräkät belän xezmättäşlek itmäw döres bulmas ide, dip äytte. İsegezdä bulsa, Mixail Rokitskiy da, Nail Xösnetdinov ta, xäzer «Berdäm Rusiä» firqäsendä kergän başqa şäxeslär dä, zamanında şul uq «Tatarstan yaña ğasır» xäräkäten oyıştırıp yörde. Bu säyäsi berläşmälärneñ ikese dä, räsmi xakimiätkä yaqın torsalar da, saylawlar waqıtında niçek itep eş itüe turında äle kileşep betä almıy

Älege matbuğat oçraşuında qatnaşqan jurnalistlar, Tatarstan keşeläre küptän tügel ütkän ictimaği-säyäsi forumğa nindi üteneç – täqdimnär äytep cibärdelär, dip küpme qızıqsınsa da, anıq cawap işetä almadı. Firqä citäkçelege Tatarstan keşelären borçıy torğan mäs’älälär xaqındağı mäğlümatlarnı tuplap, Mäskäwgä, kiläçäktä, cibärergä wäğdä itte.

Bikä Timerova, Qazan.

XS
SM
MD
LG