Accessibility links

чәршәмбе, 7 декабрь 2016, Казан вакыты 21:22

Tatar yuğarı uqu yortlarında uquçılar bulırmı?


Yuğarı uqu yortların yaqın kiläçäktä ni kötä? Belgeçlär fikerençä, bu bik qatlawlı soraw. Şaqtıy ğına uqu yortları öçen kiläçäk ber genä dä ömetle tügel. Monıñ säbäbe – ildäge demografik wazğiät. Tatarstanda da, ğömüm Rusiädäge kebek ük, soñğı yıllarda yäşlär kimi bara, balalar sanı azaya. Älege bu wazğiätneñ yuğarı uqu yortlarına tä’sire ällä ni köçle tügel ide. Bu küreneşneñ berençe qorbannarı balalar baqçaları, mäktäplär buldı. Läkin tizdän çirat yuğarı mäktäpkä dä kilep citäçäk. Alar moña äzerme soñ? Citmäsä, soñğı yıllarda bolay da az bulmağan däwlät uqu yortlarınnan tış, däwläti bulmağan, kommersiä institutları da baytaq açıldı. Alarnı nindi kiläçäk kötär? Az sanlı abiturientlarnı alar ber-berse belän niçek büleşer? Uqu yortlarındağı iñ qızu waqıt – qabul itü başlanu uñayınnan bez şuşı sorawlarğa cawap ezläp qararğa buldıq.

Bezne iñ qızıqsındırğanı – älege problemanı tatar telendä uqıtqan yuğarı uqu yortları küzlegennän qaraw. Tatar telle institutlar häm universitetlar öçen bu problema ayıruça möhim, çönki alarğa ul berençe çiratta qağılaçaq. Xäyer, bu problemanıñ buluın inqär itmäsälär dä, älege uqu yortları wäkilläre ul bezgä tiz genä qağılmayaçaq, dip sanıy. Qazan däwlät pedagogiä universitetınıñ tatar filologiäse fakul’tetı dekanı Rädif Camaletdinov fikere

Äye, Mäğärif ministrlığı mäğlümätlärenä qarağanda, balalar sanı yıldan-yıl kimi bara. Läkin bezdä alay ällä ni sizelmi äle bu xäl. Bezneñ fakul’tetqa kerergä teläwçelär älegä kimemi. Konkurs ta äzäymi. Bez bıyıl da ütkän yıllardan kim bulmağan sanğa abiturient qabul itäçäkbez

Tatar däwlät gumanitar institut rektorı Vasil Ğäyfullin isä menä niçek uylıy

Minem däwlät yuğarı uqu yortlarına kiläçäk berniçä yılda andıy qurqınıç äle yanamıy. Kommersiä institutlarında ğına studentlar sanı kimer. Bezneñ institutqa kilsäñ, bez Tatarstan öçen genä tügel, ä tatarlar yäşägän Rusiä töbäkläre häm BDB illäre öçen dä belgeçlär äzerlibez. Bez äzerlägän belgeçlärgä moxtaclıq zur äleQazan däwlät pedagogiä universitetında häm Tatar gumanitar institutında abiturientlar sanı äzäyü xaqında menä şundıy fiker yörtälär.

Xäyer, problemanı kürü genä äle ber närsä. İñ möhime, anı çişü yulların ezläw. Bu eş belän yuğarıda telgä alınğan uqu yortlarında xäl niçek tora soñ? Tatar däwlät gumanitar institutı rektorı Vasil Ğäyfullin

Bez bernindi dä äzerlek alıp barmıybız. Niçek eşlädek, şulay eşläwne däwam itäbez

Rädif Camaletdinov isä başqaraq fikerdä

Älbättä, kiläçäkkä qayber äzerlek eşläre bara inde. Bez, mäsälän, yaña belgeçlek açabız kiläse uqu yılında, pedagogik kolliätlär belän kileşülär tözibez. Bezneñ fakul’tetnı tämamlawçılar älegä bik kiräk

Menä şundıy uy-fikerlär. İşetkänegezçä, tatar telendä belem birüçe yuğarı uqu yortları kiläçäkkä optimizm belän qarıy. Bu küreneş äybät inde älbättä, läkin yış qına problemalarnıñ kötmägändä kilep çığa torğan ğädätläre dä bar. Bu oçraqta da şulay bulmasın ide.

Gölnaz İlgizär, Azatlıq radiosı, Qazan

XS
SM
MD
LG