Accessibility links

сишәмбе, 6 декабрь 2016, Казан вакыты 13:17

Yukos neft'' şirkäten kontrol''dä totuçı Menatep finans törkemeneñ direktorlar şurası räise Platon Lebedev däwlät milken üzläşterüdä ğäyeplänä


Mäskäwdä Russiäneñ xoquq saqlaw oyışmaları Menatep yabıq aksionerlıq cämğiäteneñ direktorlar şurası räise Platon Lebedevnı totqarladı. Ul 1994 yılda Apatit açıq aksionerlıq cämğiäteneñ 20 % aksiälären üzläşterüdä şiklänelä. 280-läp million dollarlıq bu aksiälärne üzläşterü däwlät milken üzläşterü dip bäyälänä. Lebedevnıñ advokatı mondıy ğäyepläwlärne kisken kire qağa.

Baş prokuratura xäbär itüençä, tikşerüçelär xäzer Lebedevtan soraw ala. Xoquq saqlaw xezmätkärläre anı xastaxanädän qulların boğawlap alıp kitkän dielä. Lebedev citäklägän Menatep törkeme dönyada 4-nçe iñ ere neft'' şirkäte Yukos aksiäläreneñ 61 protsentın kotrol''dä tota. Lebedev üze Menatepnıñ 7 protsent aksiälärenä häm Yukosnı idarä itü mäs''älälärendä Menatepnıñ 50 protsent tawışı xoquqına iä.

Lebedevnıñ totqarlanuın iğlan itü belän bergä 1998 yılda Yukos qaramağındağı könçığış neft'' şirkäten citäklägän Ramil Borhanovnıñ da däwlät milken üzläşterüdä ğäyeplänüe, ä Yukosnıñ iminlek xezmäte bülekçäläreneñ bersen citäkläwçe Aleksey Piçuginnıñ 2 keşene üterüne oyıştıruda ğäyeplänep qulğa alınuı turında mäğlümät taratıldı.

46 yäşlek Lebedev bıyıl berençe tapqır Forbes jurnalınıñ dönyadağı iñ bay keşelär isemlegenä kertelgän ide. Anıñ xosusıy milke 1 milliard dollar dip isäplänä. Ul citäklägän, Gibraltarda terkälgän 30 milliard dollarlıq Menatep törkeme neft'' häm gaz, mineral'' aşlamalar, bank, finans, investitsiälär häm telekommunikatsiälär belän şöğellänä.

Lebedevnıñ 1994-nçe yılda Apatit açıq aksionerlar cämğiäteneñ xökümät qaramağındağı 20 protsent aksiälären üzläşterü mäs''äläsen qarawnı sorap ber ay elek Däwlät Duması deputatı, Dumanıñ İqtisadıy säyäsät häm eşmäkärlek komitetı räise urınbasarı Vladimir Yudin möräcäğät itkän bulğan. Lebedev zur külämdä däwlät milken üzläşterüdä ğäyeplänergä mömkin. Ul oçraqta aña 10 yıllıq törmä cäzası yanıy.

Yukos citäkçese Mixail Xodorkovskiy bu uñaydan älege ğämällär mäskäwdä keçe eşmäkärlek belän şöğellänüçelärdän şantaj yardämendä aqça cıyıp kilgän häm küptän tügel qulğa alınğan pogonlı ubırlarnı xäterlätä dide.

Lebedevnıñ advokatı anı totqarlawğa nigez bulğan ğäyeplärne kire qağa häm Lebedevnı saq astına alu qanunğa turı kilmi di. Lebedev wäkile Yuri Kotler äytüençä, Menatep törkeme anıñ qulğa alınuına protest belderergä äzerlänä.

Yukos iminlek xezmäteneñ ber bülegen citäkläwçe Piçugin räsmi räweştä 26-nçı iyündä qulğa alınğan. 19-nçı iyüdnä tikşerüçelär Piçuginnıñ eş urınına häm yortına barıp tentü üktärgän, ike kön soñraq prokurorlar mäxkamädän anı qulğa alu röxsäte sorağan. Piçugin 2002-nçı yılnıñ noyäberendä irle-xatınlı Gorinnarnı üterüne oyıştıruda ğäyeplänä. Piçuginnıñ advokatı bu ğäyepläwne safsata dip atadı.

Ramil Borhanov 1998 yılda Yukos bülekçäse bulğan Könçığış Neft Şirkätenneñ 1 milliard sumlıq aksiälären üzläşterüdä ğäyeplänä. Borhanov Könıçığış Neft'' Şirkäte milken qanu bozıp ofşor zonağa küçergän häm Russiädän qaçıp kitkän dielä. Eçke eşlär ministrlığı Borhanovnı 2002-nçe yılnıñ ğinwar ayında xalıqara ezläw xezmätenä tapşırğan.

Russiädäge qayber säyäsätçelär häm eşmäkärlär xoquq saqlaw oyışmalarınıñ älege ğämällären Yukos citäkçese Xodorkovskiyğa basım yasaw tırışlığı dip bäyäli. Baş prokuratura Lebedevnıñ totqarlanuı bernindi säyäsi säbäplärgä bäyle tügel dip andıy fikerlärne kire qağa. Prokuratura wäkile Natalia Vişnyakova "bu - däwlät milken üzläşterügä bäyle ğap-ğadi cinayät eşe" dide.

Lebedevnıñ totqarlanuı, Piçuginnıñ qulğa alınuı häm Borhanovnıñ ezlänüe turındağı xäbärlär qimmätle qäğäzlär bazarında Yukos aksiäläreneñ bäyäse töşügä säbäp buldı näticädä Yukos ber milliard yarım dollar yuğalttı.

Naif Aqmal, Praga.
XS
SM
MD
LG