Accessibility links

чәршәмбе, 7 декабрь 2016, Казан вакыты 11:55

İtaliä premyer-ministrınıñ Yevropa parlamentındağı süzläre Berlektä zur cäncal çığuğa säbäp buldı


Üzenä Könçığış häm Üzäk Yevropa illären dä alıp, urtaq Konstitutsiä äzerläp yatqan Yevropa Berlege kötelmägän cäncal kiçerä. Anıñ üzägendä, Berlektä räislek itä başlağan İtaliäneñ premyer-ministrı Silvio Berlusconi tora. Yevropa parlamentında yasağan çığışı barışında ul Germaniädän saylanğan ber deputatnı natsilarğa tiñlägän belderü yasadı. Räsmi Berlindä bu kisken möğämälä uyattı.

İtalyan premyerı Yevropa parlamentına, Berlektä yüldä räislek itä başlağan İtaliäneñ kiläse altı ayda nindi säyäsät alıp barırğa cıyınuwı xaqında maxsus notıq totarğa kilgän ide, xörmätle tıñlawçılar. Berlusconi üze moña zur ähämiat birgän bulsa kiräk, utırışlar zalına ul bik citdi qiäfät belän kerde. İtaliä räislek itkän çaqta Berlusconi Yevropanıñ urtaq Konstitutsiäsen tikşerüne tizlätergä, Quşma Ştatlar belän aralarnı caylarğa, Yaqın Könçığış belän nığraq şöğellänergä, Törkiä, Rusiä, İzrail belän xezmättäşlekne nığıtırğa wäğdä itte. Läkin anıñ şuşı program çığışı, evroparlament deputatları belän başlanğan äytkäläşüwe häm şunnan soñ qupqan cäncal artında qaldı. Berniçä genä kön elek İtaliä parlamentı, rişwätçelektä ğäyeplängän Berlusconine, ul premyer-ministr wazifaların ütägän çorğa nindi dä bulsa cinayät eşe açudan saqlağan maxsus qanun qabul itkän ide. Yevropa demokratları monı tigezxoquqlılıq häm xoquqi däwlät prinsipların boza dip kisken tänqitläp çıqtı, häm bu mäs''älä Yevropa parlamentı utırışında da kütärelde. Läkin üzen şulay itep ğadellektän qaçuda ğäyeplägän german sotsial-demokratı Martin Schulzqa Silvio Berlusconi kötelmägän cawap qaytarıp, bar Yewropa buylap zur ğawğa çığardı.

Audio, Silvio Berlusconi

"Schulz äfände, belüwemçä İtaliädä natsi kontslagerları turında film yasawçı ber keşe bar, min sezgä şunda törmä saqçısın uynarğa täqdim itär idem" dip belderde Yevropa parlamentı utırışında İtaliä premyer-ministrı. Moñardan tış ul Schulznı häm anıñ fikerdäşe bulğan deputatlarnı, "demokratiä turistları" dip atadı häm elekke süzläre öçen ğafu ütenü taläben kire qaqtı, Yevropa parlamentına Berlusconi barı tik, "bu ironiä belän genä äytelde" digän añlatma birde. Läkin deputatlarnı bu qänäğätländermäde, alar İtaliä xökümätennän xäzer räsmi añlatmalar, döresräge xakimiatneñ premyer belderüwennän çitläşüwen kötä. Pänceşämbedä şuşı cäncal Germaniä parlamentına da barıp citte. Anda kansler Schroeder ilneñ iqtisadi säyäsäte turında çığış yasarğa tieş ide, ämma anıñ aldınnan ul Berlusconi belderüwenä qağılıp kitte, häm monıñ qabul itelmäslek ber närsä buluwın äytte.

Audio, Gerhard Schroeder

"Min İtaliä premyer-ministrınıñ şundıy qabul itelmäslek çağıştırular yasaw öçen räsmi töstä ğafu ütenüwen kötäm" di german kanslerı Schroeder. Älegä qädär Berlusconi üzeneñ anı eşlärgä cıyınmawın, yevroparlamentta äytelgän süzläre belän german xalqınıñ xislärenä qağılırğa telämäwen genä belderä. Qayber belgeçlär, ul ğafu ütengän xäldä dä soñğı cäncal Yevropanı berläşterü eşlärenä inde zian kiterde dip uylıy. Berlekneñ inde urtaq Konstitutsiäsen äzerläp yatqan ber mäldä, anda räislek itkän ilneñ premyer-ministrı, ikençe ber äğza ilneñ şomlı ütkänenä bäyle şundıy belderülär yasıy ikän, bu hiç kenä dä Berlek eçendäge üzara ışanıçnı nığıtuğa yardäm itmi, kiresençä, anda şiklänü, şöbhälänü xislären genä artıra. Andıy şartlarda isä Yevropanı berläşterü bik awır eş bulaçaq.

Kärim Kamal, Praga
XS
SM
MD
LG