Accessibility links

җомга, 9 декабрь 2016, Казан вакыты 12:58

“Töbäk üseşe strategiäse” digän 3 İdel buyı forumı…


Xäbär itkänebezçä 3 yündä Qazanda İdel buyı federal' okruğına kergän töbäklärneñ 3 cıyını açıldı. Cıyında töp tema iqtisadıy mäs'älälär, iqtisadıy üseş bulsa da, monda berniqädär säyäsättä qatnaşqan. Cıyın açıluğa bağışlap prezident kiñäşçese Rafael' Xäkimov mäğlümat çaralarına interv'yular birde. Anda ul: “Bezgä töbäklärneñ üz-ara häm federal' üzäk belän mönäsäbätläre xaqında başqalarnıñ fikerlären tıñlaw qızıq. Xäzerge waqıtqa şundıy wäzğıät kilep tudı ki, Rusiä Federatsiäseneñ ber töbägendä yäşäwçelärneñ küpçelege, kürşe töbäkneñ säyäsäte, iqtisadı, sotsial' möxite turında bik az küzallıylar” dide. Cıyın açılğaç Mintimer Şäymiew Federal' üzäk belän töbäklär arasındağı säyäsätneñ ber yaqlı ğına alıp barıluına, töbäklär mänfäğätläre laklanmawına konkret misallar kiterep töple doklad yasadı.

Soñğı waqıtta Tatarstanda telefonğa tüläwdä taşlamalar tiräsendä wäzğıät qatlawlandı. “Казанская ГТС” berläşmäse, tüläw kvitansiälärendä taşlamalarğa xaqlı grajdannarnı “yün ayınnan tulısınça tülisez”-dip kisättelär. Mäğlüm ki, älege taşlamalar “Veterannar turındağı” Federal' qanun nigezendä kertelgän. “Казанская ГТС”qa älege taşlamalar öçen yözär millionlağan burıçlar cıyılğan. Anı kem tülärgä tieş? Tatarstan xökümäte bu burıçlarnı Federal' üzäk qaplarğa tieş dip añlata. Rusiä xökümätenä taşlamalarnı qaplaw öçen 293 million rubl' aqça sorap xat cibärelgän. Ä xäzergä bu eştä qatnaşuçılar: Sotsial' yaqlaw ministrlığı, elemtäçelär, Qazan şähäre administratsiäse cıyılıp taşlamalarnı saqlap qaldırırğa, “Казанская ГТС” berläşmäseneñ qanunsız taläplären ğämäldän çığarırğa kileşkännär.

Xörmätle tıñlawçılarıbız, ä xäzer küñelleräk xällärgä küçäbez. Mäğlüm ki respublikada avtomobil' yarışlarına iğtibar köçle. Ayrat häm Radik Şäymievlär, Röstäm Miñnexanov, Salawat Fätxetdinov avtosportta Rusiädä genä tügel, Yevropada da tanıldılar. Şuşı könnärdä Ayrat Şäymievneñ avtokros Yevropa çempionatınıñ 5 etabında ciñüe turında xäbär kilde. Ä Premyer-ministr Röstäm Miñnexanov avtokros buyınça Rusiä berençelegeneñ 3 etabında ciñep çempion bulğan. Cırçı Salawat Fätxetdinovta küpkä qalışmağan, ul bişençe urında.

İntertat.ru soñğı xäbärlärendä 3 yüldä, köndezge berdä, Çallı tatar-ictimaği bülege räise Rafis Kaşapov Qazan şähäre Sovet rayonı prokuraturasında irekkä çığarılaçaq-digän xäbär tarattı. Köndezge berdä Sovet rayonı prokuraturası binasına ictimaği xäräkät citäkçelege cıyıldı. Läkin berdä dä, ikedä dä Rafis Kaşapov kürenmäde. Bu xäbärne äzerläp betergän waqıtlarda da, äle bu mäs'älädä açıqlıq yuq ide. Sovet rayonı prokuraturası tiräsendä ike televizion törkem eşläde. Berse anıñ bilgesez törkem yıraqtanraq töşerep tordı, ä berse bilgele-“Variant” televizion kanalı. “Variant” kanalın “Время и деньги” gazetasınıñ pänceşämbe sanında “Bumerang” narkomanlaşuğa qarşı jurnalistlar ber nominatsiäsendä berdänber ciñüçe dip iğlan ittelär. Ä menä İntertat.ru birgän täfsille xisapta ciñüçelär arasında “Xörriät” studiäseneñ “Toçqa oporı”, “Efir” telekompaniäseneñ “Labirint”, ”MTV-Bögelmä” kompaniäseneñ “Axır çiktä” tapşıruların kürergä bula. Ciñüçelärneñ bersennän “nigä alay ul” dip sorağaç: “Şul inde zaman çire, kommersiäläşkän mäğlümat çaraları üz uñışların ğına küpertep kürsätergä mataşalar dide.

Yunıs Ätnäle

XS
SM
MD
LG