Accessibility links

шимбә, 10 декабрь 2016, Казан вакыты 00:31

Senator Pat Roberts tizdän Ğiraqta küpläp üterü qoralları tabılırğa mömkin di


Säddam xakimiäte bärep töşerelügä 3 ay çaması waqıq uzsa da Ğiraq suğışın başlawğa töp säbäp "Bağdad üzeneñ küpläp üterü qoralları belän qurqınıç tudıra" digän ğäyepläwlärne raslawçı ışanıçlı dälillär äle dä tabılmadı. Prezident Bush administratsiäse suğış aldındağı ışandırularında arttırular qullanğan dip tänqitlänä. Şulay da Senatnıñ Küzläw Komitetı räise Pat Roberts küptän tügel Ğiraqta bulıp qaytqannan soñ jurnalistlar aldında tizdän Ğiraqtağı AQŞ xärbiläre Säddamnıñ ul qoralların tabarğa mömkin dip belderde.

Roberts älegä bu turıda täfsilleräk mäğlümätlär birü mömkin tügel, çönki älege belderü Kongressnıñ küptän tügel Ğiraqqa barğan başqa äğzaları belän bergäläp alğan yäşeren mäğlümätlärgä nigezlänä dide. Respublikan Roberts Ğiraqqa Kongressnıñ Qorallı Köçlär komitetı äğzaları belän bardı. Bu törkemdä respublikannar da demokratlar da bar ide.

Üz çığışında Roberts Bush administrtsiäsen älege yäşeren mäğlümätlärneñ hiçyuğı ber öleşen genä bulsa da cämäğätçelekkä açarğa çaqırdı.

Robert qayber säyäsi küzätüçelärneñ küzläw mäğlümätlärenä qarata totrıqlı ber fikerdä bulmawına qızğanıç belderde. Küzläw xezmätläreneñ eşen ul däwlät iminlegenä yanağan qurqınıçlarnı belü öçen törle noqtalarnı totaştıruçı analitik eş dip sürätläde.

Senator 11-nçe sentäberdän soğ AQŞnıñ küzläw xezmäte analitikların terror höcüme äzerlänüenä işarä itüçe unlap mäğlümät kilügän qaramastan alarnı ber-bersenä bäyläp näticä yasıy almawda, şul säbäple aldan kisätä, terror höcümenä qomaçawlıy almawda ğäyeplädelär di. Xäzer isä şul uq küzätüçelär kiresençä küzläw analitikları Säddam ximik häm biologik qoral yasağan digän näticä çığaru öçen kübräk mäğlümät tuplarğa tieş dip äytälär di Roberts:

AUDİO: Bügen 2-3 mäğlümätne totaştırıp näticä çığarsañ häm ul tulısınça uq raslanmasa, küzläw xezmätlären qatı tänqitli başlıylar. Min monı ğädelsezlek dip sanamıym.

Ämma Ğiraqqa barğan törkemdäge başqa ber senator Carl Levin Bush administratsiäse Ğiraq suğışı aldınnan arttırular qullanğan dip isäpli. Älege matbuğat oçraşuında çığış yasap Levin üzeneñ näq Robert kürgän mäğlümätlär belän tanışqanlığı, ämma başqa törle näticägä kilüe turında äytte:

AUDİO: Bez ul qorallarnı tapsaq ta, tapmasaq ta, Bush adminisratsiäseneñ zur ışanıç belän anda küpläp üterü qoralları buluı häm Säddamnıñ alarnı qullanaçağı turındağı ğäyeplärlärneñ küzläw mäğlümätlärenä nigezlängän buluı turındağı belderü minemçä arttırıp cibärü bulğan. Älege säfär waqıtında kürgän ber närsä dä minem ul dälillär turındağı borçulı fikeremne üzgärtmäde.

Bu matbuğat oçraşuında Qorallı Köçlär Komitetınnan tağın berniçä senator çığış yasadı. Alar älege säfär nigezendä, Säddamnıñ qoralları temasına qaramağan başqa närsälär turında da söyläde. Komitetnıñ räise John Warner Ğiraqnı tözekländerü öçen başqarası eşlärgä tuqtaldı. Levin Ğiraqta iminlek köçläre buldıru eşenä Germaniä, Fransiäne kebek illärne NATOnı häm Berläşkän Millätlär Oyışmasın cälep itärgä çaqırdı.

Naif Aqmal, Praga.
XS
SM
MD
LG