Comğa könne kiç, Qazan-Mäskäw poyezdında utırğan yäşlärneñ tatarça söyläşüçeläre Mäskäw Saban tuyına barsa, urıs telläre – şuşı Tuşinoda bulğan «Qanatlar» - festivalenä ciena ide. Şimbä töştän soñ, Mäskäw Saban tuyına şartlawlar turında xäbärlär kilep ireşte, ämma ul waqıtta tögäl mäğlümat bulmaw säbäple, anı petarda şartlağan dip kenä uyladılar. Şuña kürä Mäskäw tatar yäşläre şuşı «Qanatlar» rok festivalendä qatnaşqan dusları öçen älläni qayğırmadı. Soñınnan tulıraq xäbärlär kilep ireşkäç, tatarlarnıñ ülüçelär isemlegendä bulmağanı belende. Bäyrämova Dinara isemle qıznıñ yaralanuı da küplärne borçuğa saldı. 21 yäşlek Dinara Sklifosovskiy üzägendä yata. Anıñ qaysı şähärdän itkäne bilgele tügel.
Qazannan Mäskäwgä baruçılar arasında Dilärä Maqsutova da bar ide. 5 yül könne ul Tuşinoda tügel, ä Bitsa parkında, Saban tuyında buldı. Dilärä kebek möselmança kiengän qızlarğa tınıç könnärdä dä iğtibar küp bula, ä bu şartlawdan soñ ikençe könne ul iğtibarnıñ tağı da artqanın sizdem, dip belderde. Üze belän söyläşep qarıyq.
Xalıq qarıy inde, 2 yıl elek alay bulmağan ide. Şähär üzägendä ber aşxanädä çäy eçärgä kergäç, tabınçı qız, minnän, ber dä oyalmıyça, «sez komikadze tügelme ?», -dip soradı. Bez inde aptıradıq, ni dip cawap birergä dä belmädek. Nigä alay äytäsez, dip sorağaç, ul bolay cawap birde: «yawlıqlı qızlarnı kürgäç, şundıy assotsiatsiä tuya, bu komikadze tügel mikän?- digän qurqu uyana», dide ul. Dilärä Mäqsutova misalında ğına böten Mäskäw xalqınıñ möselmannarğa mönäsäbäte üzgärdeme, yuqmı dip äytüe çiten. Läkin ber keşe misalında bulsa da anı çamalap bula. Dilärä tutaş tıynaq qız bularaq, barısın da äytep betermäde. Ämma uramdağı keşelärneñ çamadan tış iğtibarı da, tärtip saqlawçılarnıñ tuqtatıp, buqçalarnı tikşerüe dä buldı. Ämma Dilärä bolarğa räncemi, keşelärneñ qurquın da, tikşerüçelärneñ ğämällären dä añlarğa tırışa.Bikä Timerova, Qazan.
