Accessibility links

Кайнар хәбәр

Yaña tatar pyesasın kem yazar?


Soñğı arada küp kenä töbäklärdä, xätta illärdä ütkän Sabantuylar başqa mädäni çaralarnı külägädä qaldıra töşte. Citmäsä, respublikada mädäni yañalıqlar ällä nu küp tä tügel – teatrlar yal itä, tatar estradası yoldızları da äle üz konsertların başlap cibärmägän. Alay da sezgä berniçä qızıqlı xäbär bar. Qırımda Tatarstan respublikası könnäre däwam itä. İsegezgä töşerep ütik, alar 4 yül könne başlanıp kitte. Älege çara turında tulıraq mäğlümlät alır öçen bez Tatarstan respublikasınıñ Mädäniät ministrlığına möräcäğät ittek. Ministrlıq belgeçe Rafiq äfände Äxmätov bezgä menä närsälär söyläde.

Qırım respublikası häm Tatarstan arasındağı mädäniät ölkäsendäge kileşä nigezendä bıyıl Qırımda tatarstan könnäre ütä. Anda qatnaşu öçen Qazannan Mädäniät ministrlığı wäkilläre, Ğäliäskär Kamal teatrı häm Tatarstannıñ däwlät cır häm biü ansamble kittelär. Älege könnär qısalarında balalarnıñ Söyembikä warisları festivale dä uza

Rafiq Äxmätov süzlärenä qarağanda, älegä Qırımdağı Tatarstan wäkilläre belän elemtä bik naçar. Şuña kürä, Qırım respublikasında ütä torğan Tatarstan könnäre turında tağın da täfsilleräk mäğlümätne tatarstanlılar Qazanğa qaytqaç qına alıp bulaçaq.

Ä menä Ğäliäskär Kamal teatrı direktorı Şamil Zakirovnıñ teatr artistları belän elemtäse nığraq ikän. Anıñ süzlärenä qarağanda, Qırımda bu çara da, kamallılarnıñ spektakl’läre dä bik äybät uza. Tatarstan artistları çığış yasağan barlıq zallar da şığrım tulı bulğan, di ul. Kamal teatrı Qırım tamaşaçılarına Tufan Miñnullinnıñ Ezlädem bäğrem sine spektaklen täqdim itkän.

Xäyer, bezneñ Şamil äfändegä möräcäğät itüebezneñ säbäbe beraz başqa ide. Bez añardan Azatlıq radiosı tıñlawçıları öçen Yaña tatar pyesası bäygese turında söyläwen ütendek. Şamil Zakirov bu xaqta menä bolay dide

İnde isemennän ük kürengänçä, bu bäyge yaña dramaturgiä äsärlären ezläw maqsatında ütkärelä. Çönki teatrğa yaña, bügenge kön küzlegennän çığıp yazılğan äsärlär bik kiräk. Ğomumän, soñğı yıllarda dramaturgiä probleması bik aktual’, teatrlarğa pyesalar bik az kilä. İke yıl elek Mädäniät ministrlığı tarafınnan mondıy bäyge inde oyıştırılğan ide. Şunı da istä totıp bez yaña konkurs iğlan itärgä buldıq. Anıñ näticäläre bezneñ teatr öçen bik äybät bulır dip ışanabız

Şunısın da äytep kitik. Berençe urınnı alğan pyesa avtorına 200 meñ sum premiä bireläçäk. İkençe urın öçen 100 meñ, öçençe urınğa isä 75 meñ sum aqçalata premiä tapşırılaçaq. Şulay itep, üzlärendä Kamal teatrında uynarlıq pyesa yazarlıq sälät bar dip uylawçılar 2003 yılnıñ 31 dekaberenä qädär icat cimeşlären jyuriğa tapşırırğa tieş. Mömkinçelektän faydalanıp bez Şamil äfände Zakirovtan teatrda barğan remont eşläre turında da beleştek.

Älegä remont eşläre bez uylağança bara. Minemçä, bez alarnı aldan äytelgän waqıtqa tögällärbez. Xäzer bez säxnä utların almaştırabız, iskelären inde aldıq, yañaların, zamançalarnı quyabız. Tamaşaçılar közgä bezneñ säxnäne yañaça kürerlär, alar öçen teatr tağın da mawıqtırğıçraq bulır dip ömetlänäbez

Şulay itep, tizdän tatar tamaşaçısı Kamal teatrınıñ yañartılğan säxnäsendä yaratqan spektakl’lären, söygän artistların kürä alaçaq.

Gölnaz İlgizär, Azatlıq radiosı, Qazan

XS
SM
MD
LG