İnde xäbär itkänebezçä Spas rayonında awıl xucalığına bağışlanğan seminar-kiñäşmä bara. Anıñ berençe eş köne plenar kiñäşmä belän tämamlandı. Plenar kiñäşmäne kereş süz belän Tatarstan prezidentı Mintimer Şäymiev açtı. Ul kereş süzendä respublikada sabırlıq belän, xezmät keşelären yuğaltmıyça, alarnıñ añın äkrenläp üzgärtä barıp qına, awılda reformalar alıp barıluı turında äytte dielä räsmi xäbärdä. Tatarstanda bügen törle milekle meñnän artıq awıl xucalığı şirkätläre bar- bu kooperativ xucalıqlar, ışanıç nigezendä eşläwçe cämğiätlär, açıq häm yabıq aksionerlıq cämğiätläre, unitar şirkätlär, assotsiatsiälär, şulay uq illeläp kolxozlar häm sovxozlar da bar. Ber törle ike awıl, ber törle ike qır bulmağan kebek ük, barısınıñ da täcribäse dä törle dielä prezident kereş süzeneñ eçtälegen tapşıruçı räsmi xäbärdä. Läkin Tatarstan awıl xucalığı ireşelgän qazanışların, köç –quäten cuymağan. Bezdä eşkärtelmi qalğan cirlär yuq, Tatarstanda cir eşli. Monı bıyılnıñ biş ayında awıl xucalığı citeşterüeneñ 5 protsentqa artuı raslıy. Rusiädä bu kürsätkeç 0,9 protsent. Tağın ber söyeneçle fakt: 5 ayda awıl cirendä xezmät xaqı burıçları 40 protsentqa kimegän dielä räsmi xäbärdä. Şulay itep Spas rayonındağı seminar-kiñäşmädä awıl xucalığındağı säyäsät –törle milek räweşle xucalıqlarğa däwlät qaraşı ber törle- aşlamalar, texnika belän yärdäm itü säyäsäte raslandı. Älbättä bu säyäsät Federal' üzäk säyäsäte belän dä bäyle. Cirne satu-alu, arendağa birü, watan citeşterüçelären yaqlaw problemaların Tatarstan yalğız ğına xäl itä almıy. İkmäk bäyäse tiräsendäge wäzğıät monı kürsätep tora. Küptän tügel Rusiä xökümäte bıyılğı aşlıq uñışı farazların analizlap : “İkmäkkä bäye üsmi häm üsmäyäçäk” dip beldergän ide. Läkin Rusiä Däwlät Statistika komitetı iyün ayında inflyatsiäneñ farazlağannan artıp kitüe, tormışnıñ 0,8 protsentqa ğibatlanuın iğlan itte. Rusiädä iyün ayında on bäyäse 7,5 protsentqa, ikmäk bäyäse yaqınça 5 protsentqa üskän. Tatarstanda bıyılğı uñış farazları, ikmäk bäyäläre xälläre turında iyün ayındağı ber tapşıruıbızda söylägän idek. Farazlar uñay ide. Läkin dönya xälen, bigräktä bazar xällären belep bulmıy. Menä uzğan seminar-kiñäşmädä Mintimer Şäymiev jurnalistlarğa saqlıq belän genä “ikmäkkä bäye bügengedän dä kim bulmayaçaq” digän. Häm kiñäşmäneñ tağın ber citeşsezlege. Waqıt tar bulu säbäple Prezidentnıñ Spas rayonında bulu programması tulısınça ütälmägän. Aldan iğlan itelgänçä prezident şähri Bolğar muzey-tıyulığında bula almağan.
Yunıs Ätnäle
