Accessibility links

шимбә, 3 декабрь 2016, Казан вакыты 20:45

XIV Tatar yäşläre könnäre tämamlandı...


Pänceşämbe könne qazanlılar eşkä barğanda, Tatarstan başqalasınıñ yılğa portına Boris Polevoy isemle teploxod kilep tuqtadı. Anıñ kayutalarında häm palubalarında şaqtıy yonçığan häm beraz moñsulanıp, äsärlänep qalğan 100дән artıq yeget häm qıznı küz aldına kiteregez. Alar barısı da tatar yäşläreneñ iñ sallıları diärgä bula. Çönki Rusiäneñ 30lap töbägennän waqıt häm forsat tabıp Qazanğa millättäşlär oçraşuına kilergä bik küp därt häm millätkä omtılu, şulay uq matdi häm ruxi resurslar kiräk. Şulay itep, pänceşämbe irtäsendä yılğa ber genä bula torğan Tatar yäşläre köne tämamlandı. Köymäne qarşılarğa häm yäşlärne ozatırğa kilüçelär ällä ni küp bulmadı. Monısı ğäcäp tä tügel. Rusiäneñ häm elekke Sovet respublikalarınnan kilgän yäşlär ağımdağı ğadi tormışta, suda yözep barğan bäxet baqçasında säyäxät qılunı ällä ni kürsätü, taswirlaw kiräk tabılmağan. Ämma, 14 Bötendönya tatar yäşläre könnäre istä qalaçaq häm anıñ qayber yomğaqların Azatlıq tapşırularında da yasarbız.

Ä bügen Qazanğa bıyıl kilgän yäşlärneñ küzgä kürenep ölgerüen, ziräklegen, yäştäşlärenä tartıluın, tuğan xalqına, Tatarstanğa mäxäbbät kiçerüen genä äytep kitik. Tatar yäşläre forumı bıyıl nibarı 3 täwlek yarım ğına däwam itte, ämma ul berägäyle itep oyıştırılğan ide häm bu könnär maxsus yallanğan teploxodta ütte. Üzara sayraşqan, añlaşqan yäşlär törle däreslär aldılar, Bolğar, Alabuğa, Çallı, Çistay qalaların qaradılar. Çärşämbe könne Çistay yılğa portına kilep, tatar yäşläre Ğayaz İsxaqinıñ tuğan awılı Yäwşirmägä säyäxät qıldı. Ä töştän soñ, teploxodnıñ öske palubasında Sabantuyı bilgelängän ide. Aña äzerlek tönge säğät 12 ük başlandı. Kayutalar buylap törle büläklär bäylängän tayaqlar kütärgän, cırlap, biep, taqmaqlar söyläwçe yäşlär Sabantuyı büläkläre cıydı. Ämma, dönyada bik siräk bula torğan paluba Sabantuyı barıber qorı cirgä küçärgä mäcbür buldı. Çönki cırlawçılar, biüçelär, yarışuçılar, ğomumän yäşlär, irkenlekne yarata bit.

Bik şäp ütte bu Saban tuyı. Anda xätta at çabışları da buldı. İñ köçle yegetlär arqalarına ciñel söyäkle qızlarnı atlandırıp näq ippodromdağı kebek yarıştılar. Ä kiçen teploxodnıñ tamaşa zalında yabılış cıyılışı buldı. Anısı – başqa ber qıssa. Bıyılğı Tatar yäşläre könnäreneñ üyäüçänlege ayırım ber tapşıruğa layıq. Anısın çirattağı Aulaq öy tapşıruına qaldırıyq. Tatar yäşläre isän, alar yäkşämbe Qazannan säfärgä kitep, 3 kön, 4 tön ütkärep, Tatarstan başqalasına bik nıq üzgärep qayttılar

Tatar yäşläre könnärennän iñ qızıqlı fotolarnı http://www.azatliq.ru/photo adresı buyınça internetta kürä alasız.

Rimzil Wäli, Azatlıq radiosı, Qazan

XS
SM
MD
LG