Accessibility links

дүшәмбе, 5 декабрь 2016, Казан вакыты 21:53

Başqortstan qunaqları Qazanda...


Soñğı könnärdä Qazannıñ yılğa vokzalında tatarça cır, moñ, söyläşü ayıruça yış işetelä. Äle pänceşämbe könne genä anda Boris Polevoy teploxodında säyäxät qılğan tatar yäşlären qarşı aldılar. Comğa, 11 yül könne isä, biredä kürşe Başqortstan respublikasınnan Zaytsev teploxodında säfär itüçelärne sälämlädelär. Şuşı köymädä zur ğına ber törkem tatarlar häm başqortlar 7 yül könne Ufa yılğa vokzalınnan izge Bolğar cirenä säfärgä çığıp kitkännär ide. Nihayät, comğa könne alar Tatarstanıñ başqalasına da kilep cittelär. Qazanğa qädär millättäşlärebez Bäläbäy Sabantuyında qatnaşqannar, Tübän Kamada bulğannar, Bolğar cire belän tanışqannar. Bu küñelle säfär 14 yülgä qädär däwam itäçäk. Bilgele bulğança, bu säyäxät daimi ütkärelä torğan çara. Bıyıl ul inde 11 märtäbä oyıştırıldı. Bu xaqta İzge Bolğar cirenä säfärne oyıştıruçı Marat Şäripov söyli:

Bu säfärne başqa bik küp kenä mädäni çaralar belän ber rättän bezneñ Ufa şähäreneñ törki milli ağartu üzäge oyıştıra. Alar bıyıl inde 11 märtäbä ütkärelä. Bu säyäxät kenä tügel, bu äle ike respublikanıñ kürenekle, sälätle keşeläre belän aralaşu da

Älege säfärdä qatnaşuçılar öçen bik bay mädäni programma da äzerlängän. İke respublikanıñ da tanılğan cırçıları, artistları, yazuçıları, ğalimnäre belän oçraşular, aralaşular bik küp bulğan monda. Citmäsä, här yılnı säyäxät berär kürenekle şäxeskä, anıñ icatına bağışlana ikän. Bıyıl ul üzeneñ 55 yıllıq yubileyın bäyräm itüçe şağir, säyäsätçe Robert Miñnullinğa bağışlanğan. Anıñ üzen dä tıñlap qarıyq.

Bu säfär minem öçen ikelätä qäderle, çönki bıyıl alar minem icatıma bağışlanğan ide. Bu säfär minem küp yıllar elek şundıy uq aq paroxodqa utırıp 20 yäşlek yeget bulıp berençe märtäbä Qazanğa kilüemne xäterlätte. Min monda üzemneñ uquçılarım belän bik qızıqlı, eçtälekle oçraşular ütkärdem

Robert äfände Azatlıq radiosı tıñlawçılarına bu säyäxät turında fikerlären dä citkerde:

Bu säyäxättä törle millät xalıqları cıyılsa da, küpçelekne inde älbättä tatarlar täşkil itä. Monda zıyalı, ixtiramlı, tatar mädäniäten, telen, moñın yaratuçılar cıyılğan. Oyıştıruçılar äytüençä, älege säfärdä qatnaşırğa teläwçelär bik küp ikän, böten teläwçelär teploxodqa sıymağan da xätta. İke respublika arasındağı duslıqnı süzlär belän tügel, ä näq menä şundıy eşlär belän urnaştırırğa kiräk

Comğa köne buyı Qazan belän tanışıp, başqalabıznı kürep yörgännän soñ, Zaytsev teploxodı häm andağı säfärçelär kire yulğa çığıp kittelär. Alda alarnı äle tağın küpsanlı qızıqlı oçraşular, mädäni kiçälär, Yar Çallı şähäre belän tanışu kötä.

Gölnaz İlgizär, Qazan

XS
SM
MD
LG