Abuja, Waşington. Amerika Quşma Ştatları prezidentı Bush üzeneñ äle haman da Üzäk Küzläw idaräse CİA-neñ mödire George Tenetqa ışanuwın belderä. "Min George Tenetqa ışanam, min Üzäk Küzläw idaräsendä eşlägän irlärgä wä xatınnarğa ışanam häm min alar belän terrorğa qarşı suğışta ciñgänçegä qädär bergä eşlärgä ömetlänäm" di amerikan prezidentı. Kiçä Tenet, prezidentınıñ ğinwar ayında Ğiraq turında ışanıçlı bulmağan mäğlümat qullanuwı öçen cawaplılıqnı üz östenä alğan ide. Bush bu turıdağı belderüwen Nigeriä başqalası Abujada yasadı, ul üzeneñ 5 afrikan däwläte buylap säfären tämamlap kilä. Aq yortnıñ matbuğat wäkile, prezident belän Afrikada bulğan Ari Fleischer, Bush Tenetnıñ, anıñ üz süzläre belän äytkändä, "tanıluwı kiräk närsäne tanuwı" belän qänäğät qaldı dip belderde. CİA mödire kiçä, bez Ğiraq Afrikadan uran alırğa cıyına digän xäbärneñ şikle buluwın belä idek, läkin anı prezident çığışınnan alıp taşlamıy xata eşlädek digän ide. Bush bügen, bu turıdağı bäxäslärgä şunıñ belän çik quyıldı dip belderde.
