Accessibility links

чәршәмбе, 7 декабрь 2016, Казан вакыты 11:39

"Financial Times": Büläk qayçan rişwätkä äylänä?


Tapşıruwıbıznıñ xalıqara waqiğälärgä bağışlanğan öleşen sişämbe könne Britaniäneñ "Financial Times" basmasında dönya kürgän ber mäqälä belän tanştıru tämamlıy. Anı asılda "Demokratiä täcribäse" digän baş isem astında da birep bulır ide. Mäqälä "Büläk qayçan rişwätkä äylänä?" dip atala.

Çınnan da, ğadi ber büläk qayçan rişwätkä äylänä soñ? Şuşı sorawnı quyğan mäqälä avtorı, Jonathan Guthrie, biznesqa qatnaşı bulğan härkem qayçan da bulsa barıber şuşı başwatqıç mäs''älägä kilep terälä dip yaza häm şul uñaydan üzeneñ ber xezmättäşe misalın kiterä. Uzğan atnada ber PR şirkäte aña elektr teş fırçası, urısça щеткаsı, cibärgän häm xäzer ul ençe teşlär wä ğäyep xise belän utıra dip yaza "Financial Times" avtorı. Elektr teş fırçası, motorlı köymägä yäisä kokain tutırğan qapçıqqa qarağanda, ğadiräk stimul, älbättä, läkin xezmättäşem turıdan yara torğan keşe bularaq xäzer, 100 funtlıq cihaz aña berär maqsat belän, älege model''ne maqtap mäqälälär yazdıru niäte belän cibärelmägän mikän dip borçıla di üzeneñ tanışı turında Jonathan Guthrie. Ul üze qayçandır ber eşmäkärneñ, kiräkle mäqäläne bastırtu maqsatında berniçä meñ funt aqça birergä tırışuwın kire qaqqan bulğan, şuña kürädä tanışı xäzer añardan, büläkne qaldırırğamı ällä qaytarırğamı dip kiñäş sorarğa kilgän. Läkin min aña tögäl cawap birä almadım, di mäqälä avtorı häm büläklär birüneñ wä qunaqçılıqnıñ äxlağı çınnan da törleçä añlatıla ala dip yaza. Küptän tügel genä min tağın berniçä xäbärçe belän, ber finans şirkäte oyıştırğan çabışlarda bulğan idem, soñraq andağı şärab wä aşlarnıñ 700 funtqa töşüwen belgänçegä qädär min bu xaqta ällä ni uylanmağan da idem. Bik az keşe monı rişwät birü dip bäyäli. Läkin şul uq aqçanı sez konvertqa salıp birsägez härkem monı rişwätçelek dip atar ide. Mäğlüm audit şirkäte PriceWaterhouseCoopernıñ ber belgeçe, Will Kenyon, rişwät birü niätkä qarap bilgelänä dip isäpli. Anıñ fikerençä, niät rişwätçelek öçen iñ möhim kriteri bulıp tora. Şuşı fiker xäzer britan parlamentında qaralğan, rişwätçelekne cäzalaw turındağı qanunda da yata, ämma şul bäyälämägä tayanıp sez möhim ber möştärine, üzegezneñ barı tik duslıq xislärenä genä birelüwegezne kürsätep, almazlarda qoyındıra alasız, läkin ägär dä inde sez aña berär kontraktqa ömetlänep sağız täqdim itsägez, bu sezneñ ut belän uynawığıznı añlataçaq dip yaza "Financial Times"ta Jonathan Guthrie. Qayber ere şirkätlär qabul itkän äxlaqi normalar küpkä qulayraq, alar, büläklär häm qunaqçılıqnı kire qağunı, alarnıñ qimmätenä bäyli dip yaza ul üz mäqäläsendä.

Kärim Kamal, Praga.
XS
SM
MD
LG