Accessibility links

пәнҗешәмбе, 8 декабрь 2016, Казан вакыты 07:11

Qazan däwlät universitetında qabul itü imtixannarı başlana


15 yüldä Qazan däwlät universitetında köndezge büleklärgä kerüçelärneñ dokumentların qabul itü tämamlandı. Barlıq yuğarı uqu yortları bu könnärdä, umarta oyası kebek göjläp tora. Şul isäptän Qazan däwlät universitetı da. Mäktäp tämamlawçı balalar häm alarnıñ ata-anaları mäğlümatlar elengän taqta yanında öyelep tora, qaysısı dokumentlar qabul itä torğan öställär yanında çiratlar tora, universitet bülekläre citäkçeläre utırğan bülmälär tiräsendä yörüçelär dä kürende. «Azatlıq» radiosı xäbärçese universitetta bulğanda, köndezge bülekkä dokumentlarnı tapşıru tämamlanıp kilä ide. Tatar filologiäse fakul’tetına dokumentlarnı qabul itüçe komissiäneñ cawaplı särkätibe Fazlieva Alsu Xasäncan qızı bıyılğı uqırğa kerüçelär turında töbendägelärne söyläde.: «Bıyıl tatar tele häm ädäbiäte fakul’tetına kerergä teläüçelär bıltırğı belän çığıştırğanda ber tigez däräcädä. Tel häm ädäbiät bülegendä ber urın öçen 4 keşe yarışsa, tarix häm ingliz tele bülegendä ber urınğa 2 keşe turı kilergä mömkin. Çit töbäklärdän kilälär, Kirov ölkäsennän, Mari El häm Başqortstan respublikasınnan da kilüçelär küp. Başqortstannan bıyıl ber 5-6 keşe kilde. Alar barısı da tatar tele häm ädäbiäte bülegenä kerergä teli.»

Qabul itü komissiäse yanındağı iğlannar taqtasında bıltır iñ zur köräş barğan fakul’tet isemlekläre elengän ide. Yänäse uqığız, çağıştırığız, uylanığız... Bıltır, mäsälän, iñ zur konkurs rus jurnalistikası bülegendä, psixologiä häm xoquq belgeçleklärendä bulğan. Şuşı uq taqtada tüläwle bülektä uqu bäxeteneñ bäyäläre dä elengän ide. Mäsälän, iñ qıybatlı bülektä, xalıqara mönäsäbätlär bülegendä uqu, ber yılğa 34 meñ sum tora. Xoquq belgeçlegen alırğa teläüçelär ber yılğa 30 meñ sum tülärgä tieş bula. Ekologiä häm kerüçelär küp bulğan başqa fakul’tetlarda uqu 20 meñ sum tiräse tora. İñ arzan student kenägäse texnik büleklärdä birelä häm 18 meñ sum tora. Şuşında uq, iğlannar belän tanışıp toruçı ber apa häm anıñ qızı belän söyläşep aldım. Alar Quqmaradan kilgän bulıp çıqtı. Tatar tele bülegenä dokumentların tapşırğannar. Uqırğa kerüçe qız tatar telen yaratam disä dä, uqıtuçı bulırğa telämäwen äytte. Qıznıñ änise äytüençä, aqçası häm tanışlığı bulmağan keşelärneñ uqırğa kerü mömkinlekläre çikle. Alar üz köçenä genä ışana.

Köndezge bülekkä qabul itü imtixannarı 17 iyüldän alıp 29 iyüldä qädär arada baraçaq. Ä çittän torıp belem alırğa teläüçelärneñ dokumetlarnı tapşırırğa zapasta äle berniçä köne bar. Alar imtixannarnı da avgust ayında ğına tapşıra başlıy. Universitet talibı bulu bäxetenä ireşkän barlıq keşelärneñ isemlege avgustnıñ 20-lärendä bilgele bulırğa tieş.

Bikä Timerova, Qazan.

XS
SM
MD
LG