Accessibility links

якшәмбе, 4 декабрь 2016, Казан вакыты 17:17

İrina Xakamada Qazanda keçe eşmäkärlek problemaların tikşerä


Qazanğa comğa könne çirattağı däräcäle qunaq kilde. Bu yulı – Uñ köçlär berlege firqäse liderlarınıñ berse, Rusiä Duması vitse-spikerı İrina Xakamada. Ul Qazanğa SPS firqäseneñ Tatarstandağı bülekçäsendä oçraşular ütkärü häm respublika eşmäkärläre belän oçraşıp söyläşergä kilsä dä, berençe bulıp İrina xanım Däwlät Şurasına yul tottı. Monda anı Tatarstannıñ spikerı Färit Möxämmätşin qabul itte. Oçraşu yartı säğättän artmas dip kötelsä dä, jurnalistlar yanına Xakamada belän Möxämmätşin ber säğättän artıq waqıt uzğaç qına çıqtılar. Oçraşuda şulay uq Tatarstan Däwlät Şurası räise urınbasarı Robert Miñnulin, SPS firqäseneñ respublika bülekçäse citäkçese Fedor Fomuşkin da qatnaştılar. Bu söyläşü häm anıñ näticäläre turında Färit Möxämmätşin menä närsälär söyläde.

Sez belgänegezçä, İrina Xakamada Rusiä Dumasınıñ vitse-spikerı da. Min anı şuña kürä dä qabul ittem. Oçraşuda bez qanunnar çığaru, alarnı täñgälläşterü, kamilläşterü yulları turında söyläştek. Şulay uq Uñ köçlär berlegeneñ eşçänlege turında da fikerlär alıştıq. Minemçä, oçraşu bik qızıqlı häm näticäle buldı

İrina Xakamada säfäreneñ töp maqsatına – eşmäkärlek mäs’äläsenä kilep, aña bu turıda da sorawlar birelde. Anıñ fikerençä, Rusiä – zur biznes häm ere şirkätlär ile. Ä iqtisatnıñ üseşe öçen keçe eşmäkärlek, urta biznes wäkilläre citeşmi. Xäyer, Tatarstanda bu tarmaqta eşlär äle şaqtıy uñışlı bara, dide Xakamada. Färit Möxämmätşin isä İrina xanımnı respublikada bu ölkädäge başqa aldınğı ğämällär belän dä tanıştırdı.

Könneñ ikençe yartısında İrina Xakamada Qazan milli-mädäni üzägendä respublikanıñ eşmäkärläre belän oçraştı. Anda Rusiädä eşmäkärlek problemaları, alarnı çişü yulları turında süz bardı. Äytergä kiräk, İrina xanım bu mäs’älälär belän inde 90 yıllar urtasınnan birle şöğellänä. Soñğı arada Uñ köçlär berlege dä bu tarmaqtağı xällärgä häm alarnı çişü yullarına iğtibarnı köçäytte. Ni disäñ dä, bazar iqtisatlı il öçen bu bik ähämiätle problema bit. Citmäsä, alda saylawlar da kötä.



Gölnaz İlgizär

XS
SM
MD
LG