Ğayaz İsxaqi uquları 19nçı yüldä, Yawşirmädä köndezge säğät 11dä başlanıp kitte. Ä aña qädär bäyrämgä dip Qırımnan, Qazannan, Çallıdan, Çistaydan häm başqa cirlärdän kilgän xalıq İsxaqıynıñ tuğan awılı belän tanıştı, anıñ muzeyın qaradı, yazuçınıñ tormışı, icatı belän tanıştı. Xäyer, bäyräm ütkän cir tiräsendä urnaşqan satu noqtalarında yörüçelär dä şaqtıy ide. Bäyrämneñ tantanalı öleşe ğädättägeçä qotlaw süzlärennän başlanıp kitte. Berençe bulıp Tatarstannıñ mädäniät ministrı İldüs Tarxanov häm respublikanıñ yazuçılar berlege räise Foat Ğälimullin çığış yasadılar. Çistay rayonı administratsiäse başlığı da çığış yasap, Ğayaz İsxaqıy häm anıñ icatı älegä qädär öyränelep betmägän dide. Üzeneñ çığışın ul matur itep tatarça Bäyräm belän dip tämamladı.
Qotlawlardan soñ başlanğan mädäni programmanı Tatar cır häm biü ansamble başlap cibärde. Säğät dürtkä qädär däwam itkän konsertta cırçılar İdris Ğäziev, Röstäm Zakirov, Rafail Saxabiev, Qazannıñ Kamal teatrı, Nur teatrı artistları çığış yasadılar. Äytergä kiräk, şaqtıy däwamlı konsertnı, bäyrämdä yasalğan çığışlarnı könneñ esse buluına da qaramastan xalıq bik zur qızıqsınu belän axırına qädär qaradı.
Yawşirmä awılında uzğan bu uqular bıyıl äle ikençe genä märtäbä ütkärelsä dä, inde matur ber traditsiägä äwerelep bara, dip äytergä dä bula. Bu xaqta anda qatnaşuçı artistlarnıñ sanı häm sıyfatı da, milli zıyalılarnıñ küplege dä, çarada qatnaşu öçen Qazannan häm Çistaydan kilüçelärneñ küpsanlığı da äytep tora. Awıl xalqı da İsxaqi uqularınıñ alarda ütüenä, bu uñaydan şuşındıy zur bäyräm çarası uzuğa bik şat. Läkin monda kilüçelärneñ, qatnaşuçılarnıñ küpmese Ğayaz İsxaqi, anıñ tormışı, yazmışı, icatı, millät öçen köräşe turında äybät belä ikän? Bu uqular tirä-yündäge awıl xalqı öçen Sabantuy kebek ber bäyräm, uqularnı oyıştıruçılarğa çirattağı ber plan öçen ütkärelgän çara ğına bulıp qalmasın ide.Gölnaz İlgizär
