Accessibility links

җомга, 9 декабрь 2016, Казан вакыты 05:11

Yaqın arada Ğiraqtağı koalitsiä köçlärenä höcümnär artır dip kötelä.


Ğiraqta koalitsiä köçlärenä yäşeren höcümnär däwam itä. Atna axırında barlığı 4 amerikan xärbie hälak bulsa, düşämbe irtän tağın ber amerikan soldatı häm anıñ ğiraqlı tärcemäçese üterelde. AQŞ xärbi citäkçelege häm Ğitaqtağı waqıtlı Amerikan idaräse başlığı Paul Bremer äytüençä, aldağı aylarda mondıy bäreleşlär kimer dip kötelmi. Şulay da Ğiraqnıñ kiläçägenä ömet belän qarala.

Düşämbe irtän Ğiraqta tağın ber amerikan soldatınıñ üleme turında xäbär kilde. Comğa-şimbä berär soldat, yäkşämbe könne ikäw hälak bulıp beräw yaralanğan ide. Şulay itep 20 martta suğış başlanğannan birle barlığı 151 amerikan xärbie hälak buldı. Amerikan yağınıñ yuğaltuları 1991 yılğı farsı qultığı suğışındağıdan artıp kitte. 1 mayda prezident Bush Ğiraqta zur bäreleşlär tämamlandı dip iğlan itkän ide. Ämma şunnan soñ da doşman utı 37 amerikan soldatın üterde.

Citmäsä yäkşämbe könne şiği möselmannar üzäge sanalğan Nacaf şähärendä 4 meñläp keşe AQŞ xärbilärenä qarşı kisken şiğarlär qıçqırıp andağı amerikan xärbi idaräse yanına kilde.

Üzäk ştab başlığı general John Abizaid yaqın arada höcümnär artır dip kötärgä kiräk dide. Anıñ äytüençä, Ğiraqta säyäsi citäkçelärneñ idarä şurasın oyıştıru ğiraqnı tözekländerügä taba möhim adım bulıp qarala häm bu doşman köçlärneñ açuın çığarğan. Şul uq waqıtta Abizaid ägär dä tüzemlegebezne yuğaltmasaq min uñışqa ireşü mömkinlegebezgä bik zur optimizm belän qarıym dide. Ğiraqtağı wäzğiätne häm üz küzläre belän kürep bäyäläw öçen Bağdadqa kilgän AQŞ saqlanu ministrı urınbasarı Paul Wolfowitz höcüm itüçelärne qarşılıq köçläre dip tügel ä reaksiä köçläre dip atarğa çaqırdı.

Ğiraqtağı waqıtlı AQŞ administratsiäse başlığı Paul Bremer bu könnärdä Ğiraqtağı wäzğiät turında prezident Bush belän söyläşü öçen Waşingtonğa kilde häm törle televizion tapşırularda qatnaşıp Ğiraqtağı wäzğiät turında cämäğätçelekkä xisap birde. Bezgä berqädär waqıt anda qalırğa turı kiläçäk, niçä yılğa ikänen min äle äytä almıym dide Bremer. Ğiraqtağı AQŞ administratsiäse başlığı "Säddam Xösäin, minemçä, isän häm ,minemçä, ul Ğiraqta. Anı tizräk ütersäk yäki totsaq yaxşıraq bulaçaq, çönki anıñ yazmışınıñ haman da bilgesez qaluı, hiçşiksez, Säddam tarafdarlarına anı yaqlawnı arttıru mömkinlege birä" dip äytte.

Säddamnı totarğa yardäm itüçegä yäki anıñ ülemen isbatlawçığa 25 million dollar wäğdä itelgän. Küptän tügel AQŞ Üzäk Küzläw İdaräse Säddam möräcäğäte dip ber ğäräp televideniesennän tapşırılğan tasmadağı tawış çınnan da Säddamnekenä oxşağan dip beldergän ide. Bremer kübesençä Ğiraqnıñ Bağdadtan tönyaqtqaraq, sönnilär yäşägän öleşendä bulıp toruçı höcümnär artında Säddam tora dip isäplämi. Ämma anıñ äytüençä, bu höcümnärne Säddamneñ elekke yaxşı künegülär ütkän täcribäle xärbiläre oyıştıra. Höcüm itep qaçıp kitüçe törkemnärdä ğädättä 5-6 keşe bula.

Küptän tügel Ğiraqta bulıp qaytqan demokrat, Senatnıñ Küzläw Komitetı äğzası John Rockefeller IV Säddam haman da isän häm ilne kontrol''dä tota, populyarlıq aşa tügel, ä üç alu belän qurqıtu yardämendä dide.

Şulay da Bremer, Abizaid kebek ük Ğiraqnıñ kiläçägenä ömet belän qarın belderde:

AUDİO: Mimemçä, ägär dä ğiraqlılar 6-8 ayda konstitsiä äzerläp ölgersä, häm annan soñ tiz arada saylawlar ütkärelsä ber yıl eçendä anda suveren xökümät bulırğa mömkin dip isäplim.

General leytenant Ricardo Sanchez kiläçäktä 6500 keşelek Ğiraq sivil saqlanu köçläre oyıştırılaçağın iğlan itte. Bu köçlär amerikan köçläre belän bergä xezmät itäçäk häm ğiraq xalqı belän amerikannar arasında añlaşılmawçanlıqlarnı kimetü öçen tärcemäçe bulıp eşliäçäk.

Naif Aqmal, Praga.
XS
SM
MD
LG