Däwalanırğa telägän keşe ğädättä sanatoriylarnı saylıy. Meditsina häm kurortologiä üzägeneñ baş tabip urınbasarı Röstäm Ğarifcan ulı Kapatev süzlärençä, yöräk häm qan tamırları awıruları, üpkä yalqınsınuı, buınnar sızlawınnan intekkän keşelärgä bik qızu häm dımlı hawa bulğan cirlärgä baru kiñäş itelmi. Alarğa yomşağraq klimat kiräk. Röstäm Ğarifcan ulınıñ äytüenä qarağanda, Tatarstan yal yortlarında yal itüçelärneñ ber 5-10% Tönyaqtan, neft’ häm gaz çığaruçı yaqlardan kilä. Üzäk citäkçelege süzlärençä, alar däwalanu öçen genä tügel tuğan yaqların kürergä, tuğannarı belän küreşergä dip tä kilä. Şulay uq, bezneñ äñgämädäşebez äytüençä, Tatarstanğa yul totuçılar, yal yortlarında, çit ildägeçä, xezmät kürsätä belmäwgä küz yomıp, yaxşı tabiplarnıñ yärdämenä ömet itä.
Bikä Timerova, Qazan.
Bıyıldan başlap, yal itärgä telägän ğadi xezmät iäläre däwlätneñ sotsial yaqlawına ömet itä almıy. Sotsial iminiyät fondı yal itü yullamaları öçen açqa birüne tuqtattı. Bu inde yañalıq bulmasa da, belgeçlärneñ äytüenä qarağanda, alar yal itüçelärneñ sanı şul qädär kimer dip, barıber kötmägän bulğan. Tatarstan keşeläreneñ iñ populyar yal itü urınnarı bulıp haman da Qara diñgez, çit illärdän - Törkiä, Misır, İspaniä häm başqa şundıy qoyaşlı häm diñgezle yaqlar bulıp tora. Sotsial iminyiät fondı yullamanıñ küp öleşe öçen tülämi başlağaç, çit il kurortları belän Tatarstan yal yortlarındağı bäyälär täñgälläşte diärgä bula. Mäsälän Mäskäw aşa oçqanda, Törkiädä yal yortında bulıp qaytu ber atnada $150 töşärgä mömkin. Bu bäyägä ğädättä aşaw da yul çığımnarı da kerä. 10 kön-2 atnalıq yal häm qıybatlı qunaqxanä – $200-$300 dollar toraçaq ikän. Turistik şirkätlär oçqıçlarnıñ häm yal yortlarınıñ buşawınnan qurqıp, bäyälärne töşerü yulına basa. Rusiädä häm Tatarstanda urnaşqan sanatoriy häm yal yortları citäkçeläre – küp oçraqlarda bäyä töşerüne qulay kürmi. Tatarstannıñ meditsina häm kurortologiä üzäge wäkilläre äytüençä, küpçelek sanatoriylarda urınnar buş qala. Urtaça sanağanda yal yortları 60% ğına tula. Tatarstannıñ İjevka awılındağı sular belän däwalawçı sanatoriy, Bakirovo häm Vasilyevo yal yortlarına keçelär küp kilä. Başqortstandağı – Yanğan taw, Ulyanovskiy töbägendäge Undorı, häm Samara ölkäsendäge «İdel qıya taşı» sanatoriyları da buş tormıy. Läkin ütkän yılda şuşı cirlärdä yal itüçelär barıber kübräk ide, dip sağınıp söyli yullamalarnı satuçılar.
