Wäkillekneñ citäkçese urınbasarı Xäydär Ğıyl'fanov äytüençä, Tatarstannıñ mäğärif ministrlığı häm yäşlär eşläre häm sport ministrlığı yärdäme belän Qazannıñ Aqqoş küle buyında tatar tele söylämen kamilläşterü programması buyınça Yekaterinburg häm Yuğarı Pışma şähärlärennän 18 bala yal itep qaytqan. İdel häm Çulman yılğaları buyınça teploxodta säyäxättä Tatar yäşläre könnären bäyräm itüdä Yekaterinburgtan 3 keşe, Pervoural'skidan 2 keşe qatnaşqan. “Millätebez xäzinäläre” dip atalğan maxsus programma buyınça yal itärgä dip Alapay şähärennän “Çulpan” ansamble balaları cibärelgän. Ä borınğı Bolğar babalarıbıznıñ tarixi mirası belän yaqınnanraq tanışu öçen “İzge Bolğar serläre” digän programma buyınça Bolğar şähärendä oyıştırılğan turistik lager'ğa Pervoural'sk şähärennän 5 bala yunältelgän. Ğomumän alğanda, Sverdlov ölkäsennän barısı illeläp bala bu yıl Tatarstanda cäyge yalın uzdıra.
Tatar bişege bulıp torğan Qazanğa, Tatarstan cirenä yal itärgä barırğa teläwçe balalar bik küp. Ä baru bäxetenä yıl eçendä tatar telen öyränüdä, milli-mädäni tormışta aktiv qatnaşuçı balalar ireşä. Wäkillektä eşläwçelär fikerençä, Tatarstan cirendä yal itü tatar balalarınıñ milli eşlärdä ireşkän uñışları, tırışuları näticäse bularaq, ayırım ber büläk bulıp torırğa tieş. Yal itü çığımnarınıñ 70 protsentı tiräsen Tatarstan kütärä. Ä yul bäyäsen başlıça cirle xakimiätlär, yä sponsorlar tüli.Ata-analar da, balalar üzläre dä cäyge yaldan bik qänäğät, cäyge yalnı oyıştıruçılarğa bik räxmätle.
Tatar balalarınıñ cäyge yalın oyıştıru turında tağın ber xäbär: Küptän tügel Sverdlov ölkäseneñ Äçet rayonı, Gäynä awılında yäşüsmer ir balalar öçen sport bäyräme oyıştırıldı. Älege bäyräm Sverdlov ölkäse möselmannarı Qazıyat idäräseneñ turıdan-turı qatnaşı belän uzdırıldı. Yämle yılğa yarında ütkärelgän küñelle, mawıqtırğıç sport uyınnarınnan soñ, yäşlär bergäläşep möselmança tämle itep peşerelgän pılaw belän sıylandılar, täm-tom belän çäy eçtelär. Çäy yanında matur itep äñgämä qordılar, fiker alıştılar, şayardılar, köldelär. Annan soñ, öylä namazı waqıtı citkäç, bergäläp mäçetkä yunäldelär.Bu oçraşu yäşlär öçen küñelle dä, faydalı da bulıp uzdı.
Fäwiä Safiullina.Yekaterinburg.
