Accessibility links

шимбә, 10 декабрь 2016, Казан вакыты 17:48

İran üzendä "äl-Qaidä"neñ yuğarı däräcäle ähelläre buluwın xäbär itä


Irannıñ küzläw eşläre ministrı ildä "äl-Qaidä" törkemeneñ berniçä suğışçısı totıluwın xäbär itte, xörmätle tıñlawçılar. Alay ğına da tügel, ministr alarnıñ şul törkemdä şaqtıy yuğarı däräcäle buluwın tanıdı. Amerika Quşma Ştatları alarnıñ üzenä tapşırıluwın telär ide.

Amerika Quşma Ştatları İrannı inde küptännän bar dönya külämendä terror eşçänlegen yaqlawda ğäyepläp kilä, xörmätle tıñlawçılar. Aq yortqa xäzerge prezident Bush kilü belän bu ğäyepläwlär tağın da köçäyde genä. Soñğı märtäbä alarnı räsmi Waşington düşämbe könne qabatlağan ide. George Bush, İran Süriä belän bergä terrorçılarğa sıyınu birä, bu tulısınça qabul itelmäslek närsä, andıy däwlätlär kiläçäktä şul eşläre öçen xisap totaçaq dip kisätte. Tähran da, Damask ta amerikan yağınıñ şul ğäyepläwlären kire qağıp kilsä dä, İrannıñ küzläw eşläre öçen cawaplı ministrı Ali Yunesi belderüwe üzenä kürä Bushqa cawap yözennän yasala. İran üzendä "äl-Qaidä" törkemeneñ qayber äğzaların totqında totuwı xaqında inde ber xäbär itkän ide, läkin ul çaqta süz ğadi suğışçılar xaqında bara digän xis qaldı. Çärşämbe kön yasalğan belderüdä isä İran ministrı üz ilendä mäğlüm terror çeltäreneñ yuğarı däräcäle citäkçelären totuwın äytä. Ul alarnıñ isemnären atamasa da, "bezdä totqında "äl-Qaidä"neñ küpsanlı waq häm ere ähelläre utıra" dip belderde. Bu uñaydan mäğlümat çaralarında, İran qulında terror törkemendä ikençe urında torğan Ayman äl-Zäwähiri, yäisä oyışmanıñ iminlek başlığı Saif äl-Abdil bula ala digän farazlar kürengän ide, läkin ministr Yunesi moña açıqlıq kertüdän baş tarttı. İran prezidentı citäkçelegendä uzğan xökümät utırışınnan soñ ul, "ägär dä bezgä kemneñ dä bulsa "äl-Qaidä"gä bäyle buluwı xaqında mäğlümat kilä ikän, bez şunda uq tikşerü eşe başlap cibäräbez häm anı qulğa alabız, bez bu ölkädä nıq torabız, çönki monı eşläwne üzebezneñ burıç itep küräbez" dip belderde. İranğa "äl-Qaidä" qaldıqları Äfğanstannan qaçıp kilgän dip farazlana. Uzğan ayda İran şulay uq, üzendäge totqınnarnıñ yazmışı turında qayber illärneñ, şul isäptän Britaniäneñ dä yäşeren xezmätläre belän söyläşülär alıp baruwın da xäbär itkän ide. Moñardan tış ul Söğüd Ğäräbstanına, İranda "äl-Qaidä"gä bäyle buluda şiklänelep totılğan teläsä qaysı söğüd watandaşın tapşırırğa riza buluwın da belderde. Tähran belän Riyad araları İranda islam inqilabı bulğannan birle ike distä yıl däwamında bik kierenke xäldä ide. Amerika Quşma Ştatları İrandağı "äl-Qaidä" suğışçıların üzenä tapşırunı teli. Berençedän, xalıqara terrorğa qarşı suğış iğlan itkän Waşington şuşı törkem äğzaların Quşma Ştatlarnıñ doşmanı itep kürä häm alarnı üze xökem itärgä cıyına. İkençedän ul, tuğan illärenä qaytarılğan terrorçılarnıñ yañadan elekke eşenä qaytuwınnan qurqa. Bıyıl maynıñ 12-sendä söğüd başqalası Riyadta bulğan şartlawlarnı da näq menä "äl-Qaidä"gä bäyle keşelär oyıştıra ala dip şiklänä amerikan räsmi wäkilläre. Läkin İrannıñ eçke eşlär ministrı Abdulwaxit Musawi Lari çärşämbedä, İRNA xäbärlär agentlığı mäğlümatına qarağanda, "äl-Qaidä"gä bäyle buluda şiklänelgän ädämnärneñ qayberläre tizdän üz illärenä cibäreläçäk, qalğannarı isä cawapqa İrannıñ üzendä tartılaçaq dip belderde. Anıñ şuşı süzläre yänä Waşingtonda kisken reaksiägä säbäp bulıp, Quşma Ştatlarnıñ İrannı kiläçäktä dä xalıqara terrornı yaqlawda ğäyepläwen däwam itüwenä kiterä ala.

Kärim Kamal, Praga
XS
SM
MD
LG