Accessibility links

чәршәмбе, 7 декабрь 2016, Казан вакыты 23:31

Millät qädere, keşe qädere...


Ğäziz qärdäşlär! Azatlıq radiosınıñ tapşıruları soñğı waqıtta beraz üzgärä töşte. Yañalıqlarnı elekkeçä 8-10 minut buyı ber xäbärçe genä söylämi, ä qısqa ğına mäğlümätlärne berniçä tawış sezgä citkerä. Añlaşıladır. Xäzer ul'trakısqa, FM yışlıqlarında eşläwçe radiolar kübäyä. Azatlıq tapşıruları da qayber töbäklärdä FM yışlığında retranslyatsiälänä başladı. Şul isäptän, Tatarstandağı Yaña ğasır kanalı aşa da. Dimäk, avtomobil'däge radioalgıçlar, fatirlardağı muzıykal' üzäklär köylängän FM yışlığınnan tıñlawçılarnıñ sanı arta. Radio,televidenie, internet yäşlärne üzenä cälep itä.

Tatar telendä millät, säyäsät, iqtisat, mädäniät turında xäbär birep, törle tawışlarnı tuplap, ber kön eçendä tatar dönyasınıñ awazların citkerüçe radiolar bik az. Menä şuña kürä, salqın suğış betkäç tä, Azatlıqqa iğtibar kimemi.

Bik küp millättäş-jurnalistlar millät häm xaqiqät digän töşençälärne iñ berençe, iñ möhim däräcädä totarğa tırışa. Törle kanallarda çığış yasağan, törle töbäklärdä yäşäwçe törle yäştäge jurnalistlar arasında bigräk tä fidaqär, qıyu fikerle häm xaqiqätkä tabınuçı kollegalarıbız bar.Qayberäwlär bik qatlawlı şartlarda eşlilär, yulsız cirlärdä xäräkät itälär, tormıştağı faktlar tawınnan kiräkle çuyırçıq taşlarnı üzläre saylap alalar. Näticäse – gazeta, jurnal bitendä, televidenie, radio efirında.

Azatlıq tapşırularınıñ formatı üzgärsä dä, millätkä, demokratiägä tabınu, ruxi baylıqlarnıñ qimmäten añlaw berläşterä alarnı. Bügen barı tik ber genä kollegabıznı iskä alıyq äle. Menä inde ike atna efirda Başqortstanıñ Böre şähärendä yäşäwçe xäbärçebez Radik Nuretdinnıñ tawışı işetelmi. Uzğan sişämbedä keşe xoquqları, demokratiä, Başqortstandağı xällär turında çirattağı xäbären tapşırğannan soñ, Radik Nuretdin yöräk öyänäge belän xastaxänägä eläkkän. Xäzergä ul söyläşä almıy, dip äyttelär bezgä tabiplar.

Menä Radiknıñ soñğı birgän xäbärennän ber özek.

“Ria-Novosti” agentlığınıñ Press-klubında ber konferensiä bulıp ütte. Anıñ teması “Başqortstanda keşe xoquqları, militsiä başbaştaqlığı qorbannarı söyli”- dip atala ide. Bu konferensiäne Xoquki xäbärdarlar region ictimaği oyışması ütkärde. Ämma bu konferensiä Başqortstan respublika xäbärdarlıq çaralarında yaqtırtılmadı , yäşerelde...

Bez Radiknıñ tizräk sawığıp, söyläşä başlawın kötäbez. Xaqlıqnı söyläw haman da äle bik qimmätle, bik kiräk närsä.

Radik Nuretdin iñ qaynar temalarğa qul tiderergä qurıqmıy. Xaqlıqnı söyläwneñ ciñel tügellegen belä ul. Üze turında berniçä süz. Radik Nuretdinov Başqortstannıñ tönyağındağı urmanlı Asqın, Qara İdel yaqlarında quıp-üskän, Ufada universitet tämamlağan, eşquarlıq häm icat belän şöğellängän, tatar tele buyınça aspirantura tämamlağan, bik qızıqlı fänni xezmätläre, proza häm şiğri äsärlär icat itkän. Anıñ basılıp çıqmağan äsärläre, radio aşa citkeräse süz-fikerläre bik küp.

Bügenge süzebezneñ mäğnäse – xaqlıq qädere, keşe qädere, millätebezneñ qädere, xalqıbıznı tuplawçı gazeta-jurnallarnıñ, kitaplarnıñ, radio-televidenie kanallarınıñ qädere belän bäyle. Kön artınnan kön ütä, nindider mäğlümät çaraları açıla, qayberäwläre yabıla, kemnärder säyäsät, icat säxnäsenä kütärelä, kemnärder yuqqa çığa. Yış qına bez yuğaltularıbızğa, ruxi baylıqlarıbız, talantnıñ yazmışına, yäşlärneñ tuğan telebezdän bizüenä, ğomumän millätebezgä iğtibar itmibez. İsän bulsaq, Azatlıq radiosı bu turıda da sezneñ isegezgä töşerep torır.

Süzem şunıñ belän tämam. Azatlıq radiosı öçen Qazannan Rimzil Wäli.

XS
SM
MD
LG