Accessibility links

якшәмбе, 4 декабрь 2016, Казан вакыты 09:13

Eşsezlär sanı artu - Tatarstan sänäğäte “aqsıy” başlawımı?


25nçe yündä Qazanda Xezmät häm mäşğüllek ministrlığınıñ yomğaqlaw kollegiäse uzdı. Kollegiädä şähär, rayon xezmät häm mäşğüllek bülekläre citäkçeläre Rusiä ministrlığı wäkilläre, xökümät citäkçelege qatnaştı. Kollegiäne alıp baruçı ministr Boris Zaxarov yomğaqlaw süzendä kollegiägä anıñ qayber äğzäläre: İqtisad häm Sotsiologiä ministrlığı citäkçeläre kilmägängä qızğanıç belderde. Çönki Xezmät häm mäşğüllek ministrlığı şöğellängän problemalar tormış problemaları häm bu ber ministrlıq problemaları ğına tügel. Bez köndälek tormış problemalarınıñ iñ üzägendä eşlibez dide yomğaqlaw çığışında Boris Zaxarov. Ministrlıqnıñ eş kürsätkeçläre urtaça ğına. Rusiä töbäklärenekennän ayırılıp torğan şaqqatqıç sannar, kürsätkeçlär yuq. İñ töp mäs'älä älbättä eşsezlek. 2002nçe yılda Tatarstanda eşsezlär sanı 2 meñ keşegä, bıyılnıñ yartı yılında 5 meñ keşegä artqan. Berençe qaraşqa qurqınıç ber närsä dä yuq. Çönki ägär dä belgeçlär isäpli torğan maxsus kürsätkeçne qarasañ äytkändäy yatıp yoqlağanday bula. Eşsezlek kürsätkeçe Tatarstanda 1,33 protsent. Läkin härkem belä, räsmi terkälgän eşsezlär sanın qurıqmıyça unğa tapqırlarğa bula. Kollegiädä çığışında vitse-premyer Zilä Wälieva Tatarstanda sorı xezmät bazarı 320 meñ keşe täşkil itä dide. Läkin iqtisad, sotsiologiä belgeçläre monısı da qurqınıç tügel, qurqınıçı eşsezlek artu tendensiäse dilär. Cäy başında Boris Zaxarov matbuğat oçraşuında QamAZda, Tatnefttä meñärlägän eş urınnarı qısqartıla dip jurnalistlarğa problemanı kürsätä başlağan ide başlawın. Läkin monısı da ber qolaqtan kerep ikençe qolaqtan çıqtı küräsen. Küptän tügel Ministrlar Kabinetınıñ yartı yıllıq yomğaqlarına bağışlanğan kiñäytelgän utırışına da mäğlümat çaraları tieşle iğtibar birmädelär. Utırışta Mintimer Şäymiev sänäğät generallarına moñınça kürelmägän pıran-zaran yasadı dip kenä näticälär yasadılar. Şunnan soñ premyer-ministr Röstäm Miñnexanov Tatarstan televidenieseneñ cäyge yalğa kitkän “Итоги” programması xezmätkärlären kire qaytarıp, utırış näticälärenä bağışlanğan maxsus tapşıru yasarğa quşqan ikän. Mondıy tapşıru efirğa şul uq atnanı çıqtı da. Şunnan soñ basma mäğlümat çaralarında da analitik materiallar kürenä başladı. Sänäğät generallarına yuqqa ğına şeltä belderelmägän. Yartı yılda sänäğät üseşe 104 protsent ul käğäzdä genä ikän, bu üseş yaña eşli başlağan Tübän Qama neft' eşkärtü zavodı häm neft' bäyäläre artu xisabına ğına ikän. Şulay itep Tatarstan sänäğäte “aqsıy” başlağan. Ä bu eş urınnarı qısqaru, eşsezlek artu digän süz. Dimäk Xezmät häm mäşğüllek kollegiäsendä söylägän mäs'älälär bu problemalarnıñ “balası ” ğına. Ä “atası” yıl azağında kötelä. Ministr Boris Zaxarov yomğaqlaw süzendä sentäber ayında Respubliкa iminlek şurasınıñ xezmät häm mäşğüllek problemalarına bağışlanğan maxsus utırışı bula dip belderde.

Yunıs Ätnäle

XS
SM
MD
LG