Şuşı könnärdä Mäskäwdä ütkän yışlıqlar bäygesendä «Tele-radio kompaniä TVT» digän açıq aksionerlıq cämğiäte 39 televidenie kanalında tapşırular alıp baru xoquqın ottı. Ä «Radio Maksimum-Kazan» digän şirkät FM dulqınında 101,9 yışlığında radio tapşırular alıp baraçaq. İsemnän kürengänçä, bu berläşmä «Maksimum» radiosınıñ tapşıruların Qazandağı tıñlawçılarğa da işetteräçäk. Ä TVT kompaniäse üz TV kanalın buldıra. Älegä kanalnıñ nindi teldä söyläwe häm nindi eçtälektä buluı bilgele tügel. Tapşırularnıñ qayçan başlanuı xaqında älegä xäbär itelmi.
Läkin bu ike şirkät otqan yışlıqlarğa bötenläy başqa keşelär xuca bulırğa mömkin ide. «Azatlıq» radiosı xäbärçesenä bilgele bulğança, 39nçı kanal häm 101,9 mGz yışlığında eşläw xoquqın otu öçen älege bäygedä tağın berniçä eşmäkär qatnaşqan. Alarnıñ berse «İnterkom» kompaniäse häm anıñ wäkile Rinat Möxämmädiev, ikençese -«Watanım» radiosı häm anıñ wäkile Rawil Röstämov. Läkin, bäygedä tawış birüçe komissiä Mäskäw tatarlarınıñ proyektların yaqlamadı. Näticädä radio häm televidenie kanalınıñ ikese dä Qazan wäkillärenä eläkte.
Bikä Timerova, Qazan.
