Accessibility links

шимбә, 3 декабрь 2016, Казан вакыты 07:43

Amerikannarnıñ Saddam ulları fotoların bäyän itüwe nindi näticälärgä kiterer?


Dönya cämäğätçelege häm bigräk tä Ğiraq xalqındagı şiklärne beterü maqsatında amerikan xärbiläre elekke Ğiraq diktatorınıñ üterelgän ike ulı fotosürätlären bäyän itärgä bulğan ide. Bu xaqta qarar Quşma Ştatlarnıñ saqlanu ministrı Donald Rumsfeld däräcäsendä qabul itelgän dip belderelä. Bu uñaydan, andıy qanlı sürätlärne kürsätü üzen äxlaqi yaqtan aqlıymı digän sorawlar qalqa.

Uday häm Qusay Xösäenne yuq itü Ğiraqtağı amerikan köçläreneñ zur uñışı dip bäyälänä, alar xäzer kön sayın diärlek yuğaltular kiçergändä bigräk tä. Waşington fikerençä, Saddam xakimiateneñ iñ şomlı wäkilläre bularaq tanılğan şuşı ike keşene üterü, beryaqtan, Ğiraqta amerikannarğa qarşılıq kürsätüçe köçlärgä mäğnäle ber işarä bulıp tora, ä ikençe yaqtan, ğadi xalıqta Saddam rejimınıñ inde yañadan qaytmawına ışanıçnı arttıra. Saqlanu ministrı Donald Rumsfeld härxäldä şulay dip uylıy.

Audio, Donald Rumsfeld

"Uday häm Qusay Xösäenneñ qanlı karyerası şulay itep tämamlandı, bu Ğiraq xalqına, Xösäen ğailäseneñ yuq itelüwen häm alarnıñ inde kire qaytmayaçağın kürsätä" dip belderä Quşma Ştatlarnıñ saqlanu ministrı Rumsfeld. Anıñ şuşı fikere belän Ğiraqtağı waqıtlı amerikan idaräse başlığı Paul Bremer da kileşä.

Audio, Paul Bremer

"Saddam ulların üterüneñ strategik ähämiate şunda ki, bu bezgä Ğiraq xalqın üzebezneñ anda buluwıbızğa, ilne azat itüwebezgä, häm Baath partiäse äğzalarınıñ anda kiläçäge bulmawına künderergä yardäm itä. Häm minemçä, bu axırğı çiktä beraz waqıt ütü belän bezneñ ğäskärlärebezgä yanağan qurqınıçnı kimetügä dä bulışaçaq" di Ğiraqtağı amerikan idaräçese Paul Bremer. Menä şuña tizräk ireşü maqsatında räsmi Waşington şaqtıy bäxäsle ğämälgä, sişämbedä Ğiraqnıñ tönyağında amerikan ğäskärläre tarafınnan üterelgän Uday häm Qusaynıñ fotosürätlären kiñ cämäğätçelekkä bäyän itügä barırğa buldı. Saqlanu ministrı Rumsfeld bu xaqta qararnı üze qabul itüwe xaqında belderde, anıñ süzlärenä qarağanda, bu bik awır, läkin niçek kenä bulmasın döres qarar. Ul, "Ğiraq xalqı şuşı ike ädämneñ ülüwen raslağan dälillärne kötkän ide, häm ul minemçä, andıy raslawnı aluğa layıqlı" dip belderde.

Audio, Donald Rumsfeld

Quşma Ştatlarnıñ saqlanu ministrı Donald Rumsfeld. Amerikan citäkçeläre üzläreneñ fotolarnı bäyän itep döres eşläwenä ışansa da, dönya mäğlümat çaralarında andıy sürätlärne kürsätü äxlaqi yaqtan üzen aqlıymı, monı niçek eşlärgä kiräk digän bäxäs çıqtı. Qayber belgeçlär şul qanlı fotolarnı açıqtan-açıq bäyän itüne pornografik sürätlär bastıruğa tiñli. Döres, bu oçraqta ğäyepläwlär mäğlümat çaralarına tügel, ä bäxäsle fotolarnı xalıqqa çığarğan amerikan citäkçelärenä qarata äytelä. Qayber xäbärlärgä qarağanda, Ğiraqtağı amerikan xärbiläre dä moña qarşı bulğan, alar, elekke xakimiat tarafdarları xäzer üç alırğa tırışaçaq, Quşma Ştatlar xärbilärenä höcümnär arta ala, häm qarşı yaq ta üterelgän amerikan ğäskäriläreneñ şundıy fotoların kürsätergä omtılaçaq dip qurqa.

Kärim Kamal, Praga
XS
SM
MD
LG