Accessibility links

җомга, 9 декабрь 2016, Казан вакыты 01:09

Ğiraq: höcümnär sürätendä amerikan ğäskärläre köräşne yañaça alıp baru yulların ezli


Ğiraqta amerikan ğäskärilären üterü turındağı xäbärlär xäzer kön sayın kilep tora, xörmätle tıñlawçılar. Bu andağı amerikan xärbi citäkçelegen suğış alımnarın üzgärtügä, qarşılıq kürsätkän Ğiraq ğısyançılarına qarşı yañaça köräşügä etärä. Soñğı könnärdä bäyän itelgän mäğlümat şul xaqta söyli.

İnde menä altı atnadan artıq Tigris yılğası üzänlegendä, balçıq belän qaplanğan alaçıqlar häm quyı yafraqlı palm ağaçları arasında Quşma Ştatlarnıñ xärbi köçläre yaña törle suğış alıp bara. Qısyançılar kön sayın diärlek yasap torğan höcümnärgä cawap yözennän amerikannar şul kürenmägän doşmannarına qarşı xärbi alımnarın tağın da sığılmalıraq itärgä, alar turında mäğlümat cıyuda yaña yullar tabarğa mäcbür. Şul altı atna eçendä Quşma Ştatlar ğäskäriläre meñlägän ğiraqlını qulğa aldı, döres, alarnıñ kübese waqıtlıça, soraw alu öçen genä totqarlanğan ide, moñardan tış bäreleşlärdä yözlägän ğısyançı üterelde. İnde äytelgänçä, yuğaltular amerikannar yağında da bar, älbättä, düşämbe kön dä Bagdadta alarğa qarşı yaña höcüm alıp kilde. Läkin şul ülemnärgä qaramastan, Quşma Ştatlar xärbiläre elekke Ğiraq rejimı qaldıqlarına qarşı alıp barğan suğışında soñğı aralarda uñışqa ireşelä dip isäpli. Ber xärbi birgän mäğlümatqa qarağanda, yün başında ber amerikan ğäskärien üterü öçen Ğiraq yäşlärenä yaqınça 300 dollar aqça tülängän, xäzer isä näq şunıñ öçen 5 meñ dollar täqdim itelä, häm äle citmäsä monı da kire qaqqan keşelärgä, ğailälären üterü belän yanıylar. Quşma Ştatlarnıñ xärbi citäkçelege, bu yäşlärneñ xäzer amerikannarğa qarşı höcümnärdä bik qatnaşırğa telämäwen kürsätä dip isäpli. Ul iğtibarnı tağın şuña cälep itä, Ğiraqnıñ sönni möselmannar yäşägän öleşendä höcümnär soñğı aralarda bermä-ber kimegän, ğomumän, alar xäzer qarşılıq kürsätü üzäge bulğan Bagdad tönyağı-Tikrit-Fallujah öçpoçmağında azraq yasala ikän. Quşma Ştatlarnıñ berläşterelgän xärbi idaräse başlığı general Richard Myers küzätü eşe belän Bagdadqa kilep, şul töbäkne, Saddamnıñ elekke partiäse Baathnıñ yöräk urını dip atadı häm üz ğäskärläreneñ anda uñışlı ğına eş alıp baruwın äytte.

Audio, Richard Myers

Höcümnär sanınıñ kimüwen amerikan xärbiläre beryaqtan uñay täräqqiat dip bäyäli, çönki bu Saddamğa tuğrı bulğan Baath partiäse äğzalarınıñ äkrenläp yuq itelüwen kürsätä, ämma ikençe yaqtan xäzer qurqınıç, Ğiraqtağı Könbatış xärbilärennän andağı sivil xezmätkärlärgä häm yaña xakimiat belän eşläwçe Ğiraq keşelärenä yanıy başlayaçaq dip uylıy. Başqa çarası qalmağan häm kön sayın sannarı kimep torğan baathçılar qoralsız häm azraq yaqlanğan sivil xezmätkärlärgä höcüm itüne saylıy ala. Amerikannar xäzer mäğlümat cıyu häm qarşı yaqqa basım yasaw çaraların da qırıslata töşkän. Misal öçen, uzğan çärşämbedä alar, haman da qaçıp yatqan ber Ğiraq generalınıñ xatının häm qızın qulğa alğan, ä anıñ öyendä, "ägär dä ğailägezne azat itäsegez kilsä, birelegez!" digän yazu qaldırğan. Quşma Ştatlarnıñ Ğiraqtağı xärbi citäkçelege mondıy alımnar aqlanğan dip uylıy häm şuşı ayırım ber oçraqta bu çınnan uñışlı bulğan, inde comğa könne ük ezlängän general amerikan nığıtması qapqası qarşında päyda bulğan. Yuğaltularnı kimetü häm Ğiraq xalqı belän aralarnı yaxşırtu maqsatında amerikan yağı xäzer ğäskäriläre arasında maxsus britan törkeme belän künegülär ütkärä. Alar ğısyançılarğa qarşı köräşne, moña qädär östenlek birelgän ğadu suğış alımnarınnan terrorçılarğa qarşı kürelgän çaralarğa küçerü xästären kürä. Bügenge köndä Ğiraqta Quşma Ştatlar köçlärenä 4 meñnän alıp 5 meñgä qädär qısyançı qarşı tora, şularnıñ nigezen Saddamnıñ iminlek xezmäte keşeläre täşkil itä dip farazlana.

Kärim Kamal, Praga
XS
SM
MD
LG