Accessibility links

дүшәмбе, 5 декабрь 2016, Казан вакыты 23:38

Sverdlov ölkäsendä möselmannar cıyını...


Küptän tügel Sverdlov ölkäseneñ Krasnoufim rayonı, Sısqı awılında möselmannar cıyını bulıp uzdı. Sverdlov ölkäseneñ Qazıylat idäräse tarafınnan ütkärelä torğan mondıy olı waqiğalar inde matur ğädätkä äwerelep bara. Uzğan cäydä şundıy matur cıyınnarnıñ berse Äçet rayonı, Gäynä awılında uzdırılğan ide.Ul cıyınnan soñ awıl xalqı üzeneñ islam dinenä bulğan qaraşın üzgärtep, ike-öç ay eçendä mäçet tä tözep quydı. Mäktäp balalarına qädär mäçetkä yöri başladılar.

Sısqı awılında uzdırılğan bıyılğı cıyın üzeneñ kiñ qolaçlılığı belän şaqqatırdı. Ul könne Ufa yılğası yarındağı yäşel üzändä xalıq iskitkeç küp cıyılğan ide. Qayberäwlär xätta töbäk sabantuyında da monıñ qädär xalıq yuk ide, dieştelär. Cıyınğa tirä-yak awıllardan ğına tügel, cäyge yalğa dip yıraq şähärlärdän qaytqan qunaqlar da kilgän ide. Olısı-keçese, yäşe-qartı cäyneñ matur köne, tabiğät'neñ güzällege belän xozurlanıp, ber-berse belän aralaşıp utırdılar. Bala-çağa, yäş-cilkençäk su qoyınıp, balıq totıp, törle sport uyınnarı uynap küñel açtı. Annan soñ bar da cıynalışıp cämäğät namazı uqıdılar. Tirä-yun awıl keşeläre, kiç citkännän soñ, öylärenä qaytıp malların qarap, urnaştırıp, yañadan yılğa yarına aşıqtılar. Cıyın xörmätenä dip Krasnoufim möselmannar cämğiäte ike sarıq suyıp, tämle şulpa, pılaw peşerde. Tabiğät qoçağında äzerlängän tügäräk tabınnar yanında sıylanıp, çäyläp alğannan soñ, törle cirdä dürt-biş uçaq yağılıp, xalıq berniçä törkemgä bülende. Qazıylat işaräsenä qarağan mäxällälärneñ barısınnan da imamnar kilgän ide. Alar xalıqqa din-äxlaq temasına wäğäzlär söylädelär, päyğämbärebez Möxämmät (s.ğ.w.s.) tormışı turında bäyän ittelär. Alarnıñ härbersen dä cıyılğan xalıq yotlığıp tıñladı. Tañğa qädär din, tormış, kiläçäk turında bik canlı äñgämä qorıldı.

Keşelär üzlären qızıqsındırğan bik küp sorawlarnı birep qalırğa aşıqtılar. Sorawlar küpqırlı, tormışnıñ här yağın çağıldıra torğan buldı. Alarnıñ härbersenä cawap ta alındı.

Qazıylat işaräse citäkçese Danis xäzrät Däwlätov fikerençä, islam dinen yolalar totuğa ğına qaytarıp qaldırmıyça, yäşäw räweşenä äwerelderer öçen bik küp köç quyası bar äle. Menä şundıy cıyınnar xalıqta berdämlek, duslıq, üzara xörmät xisläre tärbiälärgä, islam dineneñ çınbarlığın açıp birergä bik yärdäm itälär. Şunıñ öçen dä xalıq üze ük bu cäydä mondıy cıyını tağın ber tapqır uzdırırğa digän täqdim kertte. Kiläse cıyınnı, peçän ösläre betkäç, avgust ayı urtalarında Ufa Şigere awılında uzdırırğa dip süz quyıştılar.

Fäwiä Safiullina.Yekaterinburg

XS
SM
MD
LG