Accessibility links

шимбә, 10 декабрь 2016, Казан вакыты 08:20

Qazan Pedagogika universitetinda çittän kilüçe tatarlarğa östenlek bireläme?


Qazan pedagogika universitetında ber urın öçen iñ zur yarış - xoquq häm pedagogika digän bülektä bulğan. Anda 1 student kenägäse öçen 7 keşe köräşkän. Ğomum universitetnı quz aldında totqanda – ber urınğa 3 keşe turı kilgän. Universitetnıñ fänni eşe belän şöğellänüçe rektor urınbasarı Yunısov Änäs Änwär ulınıñ äytüenä qarağanda, bıyıl uqırğa kerergä teläweçlärneñ sanı yaqınça 15% artqan. İñ zur awırlıq, attestatlarnıñ küçermäse belän eş itü arqasında kilep çığa, dide ul. Berniçä yuğarı uqu yortına käğäzlären tapşırğan yäşlär, qabul itü imtixannarınıñ ber köngä turı kilüen isäpläp betermi, şuña kürä, bar cirdä dä sınawlarnı da tieşençä uza almıy.

Bötendönya tatar kongressı citäkçeseneñ yuğarı uqu yortları rektorları belän çittän kilüçe tatarlarğa kvota birü turında kileşkäne xaqında pedagogika universitetında da belälär. Ämma Yunısov Änäs Änwär ulınıñ äytüenä qarağanda, ul kileşü yuridik köçkä iä tügel. Uqırğa kergändä nindi sotsial qatlam wäkileneñ taşlamaları şartlarda alınuı xaqında, «Yuğarı belem turında» häm «Mäğärif turında»ğı federal’ qanunnarda yazılğan. Yätim balalar, invalidlar, suğışta qatnaşuçılar häm başqa şundıy tör Rusiä watandaşlarınnan qala, başqa keşegä andıy taşlamalar birelmi.

Bäygedän tış uzunıñ tağın ber qanunı yulı bar, ul - 3 yaqlı kileşü tözep, maqsatçan räweştä belgeçlär äzerläw programmasına elägü. Pedagogika universitetınıñ rektor urınbasarı Änäs Änwär ulınıñ süzlärençä, belgeçlär äzerläw xaqındağı mondıy kileşülär ütkän yıldan başlap Tatarstannıñ berniçä rayonı belän inde tözelgän bulğan. Mäsälän Bögelmä, Çistay häm Bawlı rayon idäräläre, üz yaqları öçen kiräkle belgeçlärne äzerläw xaqında pedagogika universitetı belän kileşte.

Şul uq rektor urınbasarı äytkänçä, Tatarstannan çittä yäşäwçelärgä uqıtuçılar iğtibarlıraq bulsa da, alarğa bilgelärne arttırıp quya almıy. Qazan pedagogiä universitetınıñ ğomumi bülegendä 915 urın qaralğan. Tüläwle bülektä belem aluçılar, şuşı 915 urınğa östämä räweştä alına. İşetkänegezçä, tüläp uquçılar stipendiä almıy, ä 4 kä häm 5kä uqığan başqa studentlarğa stipendiä 200 sum, ä sotsial xäle awır bulğannarğa 300 sum külämendä birelä.

Bikä Timerova, Qazan.

XS
SM
MD
LG